Jańbyr baqtary jáne salqyndatqysh kıim: Tokıo klımat ózgerisine beıimdelip jatyr
ASTANA.KAZINFORM - Tokıo jıilegen aptap ystyq, nóser jańbyr jáne basqa da qubylmaly aýa raıynyń saldarynan turǵyndardy qorǵaý úshin jańa sheshimderdi engizip jatyr, dep habarlaıdy Jiji Press.
14 mıllıonnan astam adam turatyn Japonııa astanasynda qalanyń klımattyq qaýip-qaterlerge tózimdiligin arttyrýǵa baǵyttalǵan tehnologııalar men bastamalar damyp keledi.
Tokıodaǵy startaptardyń biri jasandy ıntellekt pen bultty tehnologııalarǵa negizdelgen platformany ázirledi. Ol aýa raıy jaǵdaılary men sý basý qaýpin kórneki túrde kórsetýge múmkindik beredi. Júıe belgili bir aýdandardaǵy sý basý qaýpin baǵalap, kenetten jaýǵan nóser kezinde aldyn ala sharalar qabyldaýǵa kómektesedi.
Taǵy bir baǵyt — jasyl ınfraqurylymdy damytý. Setagaıa aýdanynda turǵyndarǵa shaǵyn jańbyr baqtaryn jasaý usynylyp otyr. Olar shatyrdan jınalǵan sýdy jınap, ýaqytsha ustap turady jáne onyń topyraqqa birtindep sińýine múmkindik beredi. Mundaı sheshimder qaladaǵy sý tasqyny qaýpin azaıtyp qana qoımaı, «qalalyq jylý araly» áserin tómendetýge de kómektesedi. Jınalǵan sýdy sýarý úshin nemese tótenshe jaǵdaılarda paıdalanýǵa bolady.
Sonymen qatar japon kompanııalary adamdardy aptap ystyqtan qorǵaýǵa arnalǵan tehnologııalardy ázirlep jatyr. Jergilikti startaptardyń biri kıimge tigýge nemese mataǵa jaǵýǵa bolatyn «GıdraVolt» salqyndatqysh materıalyn tanystyrdy. Kompanııanyń málimetinshe, mata býlaný arqyly salqyndatý áseriniń arqasynda elektr qýatyn nemese batareıalardy paıdalanbaı, segiz saǵat ishinde teri temperatýrasyn 10 gradýsqa deıin tómendete alady.
Bul tehnologııa mektep oqýshylaryna arnalǵan salqyndatqysh bas kıimderdi, fýtbolkalar men kásibı beısbol komandasynyń oıynshylaryna arnalǵan tańǵyshtardy, sondaı-aq jetkizý qyzmetiniń júrgizýshilerine arnalǵan jeńqaptardy jasaý kezinde synaqtan ótkizildi. Materıal sýmen janasqannan keıin óziniń salqyndatqysh qasıetin qalpyna keltiredi jáne ony kádimgi kıim sııaqty jýýǵa bolady.
Tokıonyń bul bastamalary álemniń túrli óńirlerinde aptap ystyqtyń kúsheıýi jaǵdaıynda júzege asyrylyp jatyr. 2026 jyldyń jazynda Eýropa men AQSh-ta tarıhı deńgeıdegi aptap ystyq tirkeldi. Ǵasyrlar boıy jer silkinisinen bastap taıfýn maýsymyna deıin túrli tabıǵı qaýipterge beıimdelip kele jatqan Japonııa astanasynyń tájirıbesi klımattyq turaqtylyqty kúndelikti ómir men qalalyq ınfraqurylymǵa birtindep engizýge bolatynyn kórsetedi.
Buǵan deıin Japonııada bir apta ishinde aptap ystyqtan jeti adam kóz jumǵany habarlanǵan bolatyn.
