Jánibek Álimhanuly úsh belbeý sarapqa salynatyn tarıhı jekpe-jekke qol qoıdy

ASTANA. KAZINFORM – Taıaýda qazaqstandyq boksshynyń qarsylasy kim bolatyny jáne jekpe-jektiń ýaqyty jarııalanady. 

Bul týraly boksshynyń menedjeri Berik Sultan áleýmettik jelidegi paraqshasynda habarlady. Ol óz kezeginde WBO jáne IBF nusqalary boıynsha álem chempıony Jánibek Álimhanulynyń úsh belbeý úshin ótetin tarıhı jekpe-jekke qol qoıǵanyn, alda jankúıerlerdi keremet aıqas kútip turǵanyn atap ótti. 

– Biz barsha qazaqstandyqtar kópten kútken tarıhı jáne orta salmaqtaǵy jekpe-jektiń kelisimshartyna qol qoıdyq. Aldaǵy kúnderi promoýterlik kompanııalar resmı málimdeme jasaıdy. Bizdi keremet shoý kútip tur. Tórt tıtýldyń barlyǵyn jınaımyz degen maqsatymyzǵa jetýge jaqynbyz. Osylaı tarıhqa engimiz keledi. Sol úshin eńbektenýdemiz jáne sol eńbektiń nátıjesin kóretin kún de alys emes. Sizderdi qýantyp, osy keremet jańalyqpen aldyn ala bóliskim keldi, - dedi Berik Sultan. 

Aıta keteıik, qazan aıynyń basynda BoxingScene portaly Álimhanuly-Lara arasyndaǵy aıqas 6 jeltoqsan kúni San-Antonıodaǵy (Tehas) boks keshinde ótedi dep aqparat taratqan edi. Atalǵan boks keshiniń basty kezdesýinde Lamont Roých pen Isaak «Pıtbýll» Krýz judyryqtasady. 

Sondaı-aq buǵan deıin ózbekstandyq boksshy Jánibek Álimhanulymen jekpe-jekke daıyn ekenin aıtyp, málimdeme jasaǵanyn jazǵanbyz.