Jánibek Álimhanulynyń «V» synamasy dopıng baryn rastady — QKBF
ASTANA.KAZINFORM - Qazaqstan kásipqoı boks federatsııasynyń prezıdenti Rahymjan Erdenbekovtiń aıtýynsha, Álimhanuly tergeý aıaqtalǵanǵa deıin barlyq jekpe-jekten shettetildi.
Bir kún buryn Erdenbekov Instagram jelisindegi paraqshasynda bokstan álem chempıony Jánibek Álimhanulynyń isi qaralyp jatqanyn habarlaǵanymen, naqty málimet bermegen edi.
20 qańtarda QKBF prezıdenti alǵash ret Jánibek Álimhanulynyń dopıng-synamasynyń qorytyndysyn jarııalap, tyńdaý týraly egjeı-tegjeıli aıtyp berdi.
— Jaqynda Amerıkadaǵy VADA uıymynan 34 betten turatyn saraptama qorytyndysy kelip, V synamasy rastaldy (Álimhanulynda dopıng bar ekeni —red). Qazirgi tańda Jánibekke qatysty ıýrısdıktsııany bizdiń federatsııa óz qolyna aldy. Óıtkeni ol — federatsııamyzdyń lıtsenzııalanǵan boksshysy. Sonymen qatar onyń qatysýymen ótken sońǵy boks keshi Astanada, bizdiń sanktsııamyzben uıymdastyryldy. Qazir basty másele — ol bul zatty ádeıi qabyldady ma, joq pa? Onyń aǵzasyna qalaı tústi? Ázirge osy suraq ashyq kúıinde tur, — dedi Rahymjan Erdenbekov.
Ol bir kún buryn, 19 qańtarda ótken tyńdaýdyń egjeı-tegjeıin de aıtyp berdi.
Belgili bolǵandaı, Álimhanulynyń isin táýelsiz sarapshylar da, QR Týrızm jáne sport mınıstrliginiń ókilderi de qarap jatyr. Tyńdaý sportshynyń kinásizdik prezýmptsııasyn qýattaı otyryp, halyqaralyq sport quqyǵy standarttaryna sáıkes ótkizilip jatyr.
— Jánibekke kóptegen suraq qoıyldy. Sáýir aıynan beri biz onyń osy zattar anyqtalǵanǵa deıingi búkil ómir jolyn tyńdadyq. Keshe men qazir jarııalaı almaıtyn jańa derekter belgili boldy. 23 qańtarda tyńdaýdy jalǵastyramyz, - dedi Erdenbekov.
Ol isti qaraý qorytyndysy boıynsha barlyq materıal tıisti uıymdarǵa, sonyń ishinde WBO, IBF jáne basqa da uıymdarǵa joldanatynyn atap ótti. Tıtýldarynan aıyrý nemese aıyrmaý jónindegi sheshimdi sol uıymdar qabyldaıdy. Al qazir, tyńdaýlar ýaqytynda Jánibek Álimhanuly jekpe-jekterden shettetildi.
Eske salaıyq, 2025 jyldyń 6 jeltoqsanyna josparlanǵan WBA nusqasy boıynsha álem chempıony Erıslandı Laramen úsh tıtýl úshin ótetin jekpe-jekke úsh kún qalǵanda qazaqstandyq chempıonnyń synamasynan tyıym salynǵan meldonıı zaty tabylǵany jarııalandy. Sóıtip Jánibektiń eń mańyzdy jekpe-jegi toqtatyldy.
Qazaqstandyq boksshy Jánibek Álimhanulynyń dopıng daýyna qatysty isi 23 qańtarda qaıta qaralatynyn jazǵan bolatynbyz.
WBO jáne IBF tujyrymdary boıynsha orta salmaqtaǵy álem chempıony Jánibek Álimhanuly dopıng daýyna qatysty óz pikirin aıtty.