Jánibek Álimhanulynyń dopıng isine qatysty mańyzdy jańalyq aıtyldy

ASTANA. KAZINFORM - Álem chempıony, qazaqstandyq kásipqoı boksshy Jánibek Álimhanulyna qatysty dopıng daýyna baılanysty tergeýdiń jańa kezeńi bastaldy.

Qazaqstan kásipqoı boks federatsııasynyń málimetinshe, dopıng-baqylaý nátıjeleri boıynsha alynǵan B synamasyn ashý kúni men ýaqyty belgilengen.

Federatsııanyń túsindirýinshe, bul kezeń sportshynyń quqyqtaryn saqtaý jáne protsestik ashyqtyq turǵysynan asa mańyzdy.

— Halyqaralyq tájirıbede B synamasyn taldaý tek A synamasynyń bastapqy nátıjelerin rastaý nemese joqqa shyǵarý qajettiligi týyndaǵan jaǵdaıda ǵana júrgiziledi. Protsedýra táýelsiz, akkredıttelgen zerthanada júzege asady jáne barlyq hattamalyq talaptar qatań saqtalady. Sonymen qatar sportshynyń jáne múddeli taraptardyń ókilderiniń qatysýyna múmkindik beriledi. Dál osy tetik obektıvtilikti qamtamasyz etip, kez kelgen qatelik nemese qate túsindirý yqtımaldyǵyn boldyrmaýǵa qyzmet etedi, — dep málimdedi Qazaqstan kásipqoı boks federatsııasy.

Sondaı-aq federatsııa B synamasyn ashý kúniniń belgilenýi qandaı da bir zańbuzýshylyqtyń moıyndalýy bolyp tabylmaıtynyn jáne aldyn ala qorytyndy jasalmaıtynyn atap ótti. Bul halyqaralyq antıdopıngtik erejelerde qarastyrylǵan, faktilerdi túpkilikti anyqtaýǵa baǵyttalǵan standartty rásimdik qadam.

Federatsııa ókilderi eki synama boıynsha da resmı qorytyndy alynǵanǵa deıin Jánibek Álimhanulynyń jaǵdaıyna qatysty kez kelgen jarııa málimdemelerge, boljamdar men baǵalaý pikirlerine qarsy ekenin jetkizdi.

B synamasyn ashýdyń naqty kúni ázirge jarııa etilgen joq. Sonymen qatar federatsııa VADA uıymynan A synamasy boıynsha resmı ári tolyq jaýapty áli de kútip otyrǵanyn habarlady.

Eske salsaq, WBO jáne IBF tujyrymdary boıynsha orta salmaqtaǵy álem chempıony Jánibek Álimhanulynyń dopıng synamasynan qandaı tyıym salynǵan zat tabylǵany belgili boldy.

Sonymen qatar Týrızm jáne sport vıtse-mınıstri Serik Jarasbaev boksshy Jánibek Álimhanulynan dopıng tabylýyna qatysty pikir bildirdi.