Jánibek Álimhanulynyń chempıondyq jekpe-jek aldyndaǵy álsiz tusy anyqtaldy
ASTANA. KAZINFORM – AQSh-ta qazaqstandyq boksshy Jánibek Álimhanulynyń WBO nusqasy boıynsha álem chempıony ataǵy úshin ótetin jekpe-jektegi múmkindigine baǵa berildi, dep habarlaıdy INFORMSPORTS.
Amerıkalyq Boxing News 24 portaly qazaqstandyq Jánibek Álimhanuly men danııalyq ıAkob Bank arasyndaǵy aldaǵy jekpe-jekke taldaý jasady. Eki boksshy 23 qańtarda Danııanyń Horsens qalasynda ekinshi orta salmaqtaǵy (76,2 keli) WBO uıymynyń bos turǵan chempıondyq belbeýin sarapqa salady.
Basylym sarapshylarynyń pikirinshe, 25 jastaǵy ıAkob Banktiń tájirıbeli qazaqstandyq qarsylasynan birneshe artyqshylyǵy bar. Atap aıtqanda, onyń jasy, jekpe-jekterge turaqty qatysýy jáne ekinshi orta salmaq dárejesine beıimdelýi erekshe atap ótilgen.
2026 jyly Bank úsh kezdesý ótkizse, 33 jastaǵy Álimhanuly bıyl rıngke shyqpaǵan.
Sarapshylar muny qazaqstandyq boksshynyń basty osal tustarynyń biri dep esepteıdi.
Sonymen qatar, amerıkalyq portal Banktiń kýbalyq Ýılıam Skýlldy 12-raýndta toqtatqan jeńisine nazar aýdarǵan. Buǵan deıin Skýll meksıkalyq Saýl «Kanelo» Alvareske qarsy 12 raýnd tolyq judyryqtasqan bolatyn. Mamandardyń paıymdaýynsha, danııalyq boksshy úzdiksiz qysym jasaýdyń arqasynda nátıjege qol jetkizgen.
Degenmen Jánibek Álimhanulynyń da basym tustary bar. Atap aıtqanda, onyń chempıondyq jekpe-jekterdegi tájirıbesi men qaýipti qarymta soqqylary qarsylasyna aıtarlyqtaı qıyndyq týdyrýy múmkin.
Sarapshylar qazaqstandyq boksshynyń brıtandyq Denzel Bentlıdi tóreshiler sheshimimen qıyndyqpen jeńgenin de eske saldy. Olardyń pikirinshe, bul kezdesý Álimhanulynyń bedeli kez kelgen qarsylasty ońaı jeńýge kepil bola almaıtynyn kórsetken.
Aıta keteıik, ekinshi orta salmaqtaǵy WBO chempıondyq belbeýi brıtandyq Hamza Shıraz tıtýlynan bas tartqannan keıin bos qalǵan. Ol Jánibek Álimhanulyna qarsy mindetti tıtýl qorǵaý jekpe-jegin ótkizýden bas tartqan bolatyn.
Osylaısha, «Qazaq stıli» atanǵan Jánibek Álimhanuly úshin aldaǵy kezdesý jańa salmaq dárejesindegi mańyzdy synaq bolmaq.
Aıta ketelik Jánibek Álimhanuly 23 qańtarda álem chempıony ataǵy úshin jekpe-jek ótkizedi.
