Jánibek Álimhanulyna qatysty dopıng daýynyń mán-jaıy belgili boldy
ASTANA. KAZINFORM — Qazaqstan Kásipqoı boks federatsııasynyń prezıdenti Rahymjan Erdenbekov WBO jáne IBF nusqasynyń álem chempıony Jánibek Álimhanulyna qatysty dopıng daýyn tergeýge baılanysty jaıdy jarııa etti.
2025 jyldyń 6 jeltoqsanyna josparlanǵan WBA nusqasy boıynsha álem chempıony Erıslandı Laramen 3 tıtýl úshin ótetin jekpe-jekke úsh kún qalǵanda qazaqstandyq chempıonnyń synamasynan tyıym salynǵan meldonıı zaty tabylǵany jarııalandy.
20 qańtar kúni sportshynyń «V» synamasynda da dopıng bary rastaldy.
Osydan keıin World Boxing Organization orta salmaqtaǵy álem chempıony Jánibek Álimhanulyna tyıym salynǵan meldonıı zaty boıynsha oń nátıje kórsetken dopıng synamasyna baılanysty bir jyl merzimge jarystardan shettetý jazasyn qoldandy.
Degenmen, chempıondyq ataqtary sportshynyń ózinde qaldyryldy. Shettetý merzimi ishinde boksshy kez kelgen kásibı nemese kórsetilim jekpe-jekterine qatysa almaıdy.
AQSh-ta boksshynyń aǵzasyna dopıngtiń qalaı túskeni týraly málimetter jarııalanǵannan keıin, jankúıerler arasynda «Álimhanuly sııaqty ataqty sportshy nelikten jekemenshik klınıkaǵa júgindi jáne dárigerler meldonııi bar preparat sportshylar úshin dopıng sanalatynyn nege bilmegen?» degen suraqtar týyndady.
Bul saýaldarǵa Qazaqstan Kásipqoı boks federatsııasynyń prezıdenti Rahymjan Erdenbekov jaýap berdi.
Onyń aıtýynsha, 9 qańtardan bastap federatsııa tórt otyrys ótkizip, 5 sáýirden (Jánibektiń sońǵy jekpe-jeginiń kúni) bastap, jekpe-jek aldyndaǵy testileýden ótkenge deıingi ýaqyt aralyǵyndaǵy oqıǵalardyń hronologııasyn egjeı-tegjeıli qalpyna keltirgen. Árbir jattyǵý, tamaqtaný tártibi, qalpyna kelý úderisi jáne dárýmender qabyldaýy qarastyrylǵan. Sol kezde Álimhanulynyń mamyrda densaýlyǵynyń nasharlaýyna baılanysty májbúrli túrde jekemenshik klınıkaǵa baryp, meldonııi bar ekpe alǵany anyqtalǵan.
— Qazaqstan Respýblıkasynyń Konstıtýtsııasyna sáıkes, árbir azamattyń densaýlyǵyn qorǵaýǵa jáne medıtsınalyq kómek alýǵa quqyǵy kepildendirilgen. Bul quqyqtan eshkim aıyra almaıdy. Atalǵan jaǵdaıda sporttyq kórsetkishterin jaqsartý maqsatynda tyıym salynǵan zatty ádeıi qoldaný nıeti bolmaǵan. Zat sportshynyń aǵzasyna ómirlik kórsetkishter boıynsha túsken. Sportshynyń ózi preparat quramynda meldonıı bar ekenin bilmegen. Al tekserýden keıin emdelý shuǵyl túrde júgingen medıtsınalyq mekemede bastalǵan. Sebebi demalys kúni bolǵan jáne jaǵdaıy jedel aralasýdy talap etken, — dedi federatsııa basshysy.
Onyń aıtýynsha, dáriger reglamenttelgen normalarǵa jáne patsıenttiń jaǵdaıyna baılanysty áreket etken.
— Sondaı-aq, taǵaıyndalǵan «Repronat» preparaty Qazaqstanda tyıym salynbaǵan jáne el boıynsha medıtsınalyq tájirıbede keńinen qoldanylatynyn, dárihanalarda erkin satylatynyn atap ótkim keledi. Sport salasyna qatysy joq dáriger VADA-nyń tyıym salynǵan preparattar hattamasyn bilýge mindetti emes. Tek mamandandyrylǵan sport dárigerleri ǵana VADA hattamalarymen egjeı-tegjeıli tanys. Sebebi olar sol baǵytta jumys isteıdi. Medıtsınalyq qorytyndyda kórsetilgen belgiler quramynda tsıtoprotektor retindegi meldonııi bar «Rıpronat» dárisin shuǵyl qoldanýdyń durystyǵyn dáleldeıdi, — dep jazdy Rahymjan Erdenbekov Instagram paraqshasynda.
QKBF basshysy federatsııanyń suraýynan keıin medıtsınalyq klınıka tolyq medıtsınalyq qujat usynǵanyn atap ótti.
— Klınıka tergeý júrgizý barysynda yntymaqtastyqqa ashyq boldy. Medıtsınalyq kómekke júginý faktisi memlekettik medıtsınalyq qyzmetter tiziliminde tirkelgen. Bul derekterdi ótip ketken datamen ózgertý múmkindigine jol bermeıdi, — dep sendirdi federatsııa basshysy.
Arýjan Jánádil