Jánibek Álimhanulyn dopıng daýyna qaramastan tıtýldyq jekpe-jekke shaqyrdy
ASTANA. KAZINFORM - Orta salmaqtaǵy WBC nusqasy boıynsha álem chempıony domınıkandyq Karlos Adames orta salmaqta WBO jáne IBF chempıony atanǵan Jánibek Álimhanulymen jekpe-jek ótkizýge daıyn ekenin jetkizdi.
Qazaqstandyq bylǵary qolǵap sheberiniń birden eki dopıng-synamasynda tyıym salynǵan meldonıı zatynyń bolýy oń nátıje kórsetti. Soǵan qaramastan Karlos Adames jekpe-jekke daıyn jáne qazaqstandyq boksshymen jekpe-jek ótkizgisi keletinin jarııalady.
- Bizge ázirge kúte turýǵa týra keledi. Ol dopıngty paıdalanǵany úshin óz jaýabyn aıtady. Biraq meniń Jánibekpen básekelestigim týraly túsinigim jeke maqsatta dep sanaımyn. Jankúıerler arasynda Jánibek Álimhanuly men WBA nusqasy boıynsha álem chempıony Erıslandı Laranyń jekpe-jegi erekshe qyzyǵýshylyq týǵyzǵan edi. Degenmen Jánibekten dopıng anyqtalyp, jekpe-jek ótkizilgen joq. Eger siz menen «Qazaqstandyq boksshymen kúsh synasqyń kele me?» dep surasańyz, men «ıá» dep jaýap beremin. Bul jerde dopıng eshqandaı mańyzdy emes. Óıtkeni men ózimdi sharshy alańda Jánibekke qarsy tekserip kórgim keledi. Aıta keteıin, ol dopıngti qanshalyqty paıdalansa da, onyń meni jeńetinine eshkim kepildik bermeıdi. Eger men mansapty aıaqtamas buryn onymen kúsh synasýǵa múmkindigim bolsa, Jánibekpen jekpe-jek ótkizýge kelisim beremin, - dedi Karlos Adames The Ring jýrnalyna.
Adames Jánibekpen kezdesýge daıyn ekenin málimdeı otyryp, oǵan qarsy syn da aıtty.
- Dosym Larany aıaımyn, óıtkeni Jánibek oǵan qarsy ádil jekpe-jek ótkize alǵan joq, - dedi Adames. - Jánibek aldaýǵa jáne las áreketke jol berdi. Álimhanulynyń jasy Laradan birshama tómen edi, biraq báribir dopıng qoldandy. Jánibek tyıym salynǵan dári-dármek arqyly basymdyqqa ıe bolǵysy keldi. Men dosym úshin ókinemin. Sebebi ol ataqtardy biriktirý úshin kúresýge kóp ýaqytyn sarp etti. Jánibek bizdi aldap, sportqa adaldyq tanytqan joq, - dedi Karlos Adames.
Aıta keteıik, Jánibek Álimhanulynyń oń dopıng-synamasyna isimen Qazaqstan kásibı boks federatsııasy aınalysyp jatyr. Sheshim shyǵarylǵannan keıin barlyq materıal iri halyqaralyq federatsııalarǵa beriletin bolady.