Jánibek Álimhanuly jańa salmaqta WBO reıtınginiń 2-satysyna jekpe-jeksiz jaıǵasty
ASTANA. KAZINFORM – Orta salmaqta WBO jáne IBF tujyrymdary boıynsha álemniń burynǵy chempıony Jánibek Álimhanuly (17-0, 12 KO) jańa salmaq dárejesine resmı aýysqannan keıin, Búkilálemdik boks uıymynyń (WBO) jańartylǵan reıtınginde birden 2-satyǵa jaıǵasty, dep habarlaıdy Informsports.kz.
Ol reıtıngide tek meksıkalyq juldyz Saýl «Kanelo» Alvareske ǵana jol berip tur, al bul dıvızıondaǵy WBO álem chempıony belbeýi qazirgi ýaqytta brıtanııalyq Hamza Shırazǵa tıesili.
Esterińizge sala keteıik, 2026 jyldyń 21 shildesinde «Qazaq Style» orta salmaqtaǵy WBO tıtýlynan bas tartyp, 76,2 kelige deıingi salmaqqa aýysatynyn jarııalaǵan edi. Ol bosatqan orta salmaqtaǵy chempıondyq belbeý avtomatty túrde ýaqytsha chempıon bolyp kelgen brıtanııalyq Denzel Bentlıge (22-3-1, 18 KO) buıyrdy.
Jánibektiń sýper-orta salmaqqa kelýi burynnan kútilgen úlken teketiresterge jol ashpaq. Naqtyraq aıtqanda, 31 qazanda meksıkalyq Saýl «Kanelo» Alvares pen WBC chempıony Krıstıan Mbılı arasynda aıqas ótedi. Osy jekpe-jektiń jeńimpazy bolashaqta Álimhanulynyń tıtýl úshin negizgi qarsylastarynyń birine aınalýy ábden múmkin.
Alaıda otandyq boksshynyń sharshy alańǵa oralýy jyl sońyna qaraı josparlanǵan. Dopıng-synamasynan (meldonıı) shıkilik shyǵyp, bir jyldyq shettetilý jazasyn ótep jatqan Jánibektiń dıskvalıfıkatsııa merzimi osy jyldyń jeltoqsan aıynda aıaqtalady. Osydan keıin ǵana ol jańa salmaqtaǵy alǵashqy resmı jekpe-jegin ótkize alady. Sport sarapshylary Álimhanulynyń fızıkalyq parametrleri men áýesqoı bokstaǵy (75 kelide álem jáne Azııa chempıony atanǵan) tájirıbesi bul salmaqqa óte qolaıly ekenin aıtyp otyr.
Dúnıejúzilik boks uıymy (WBO) qazaqstandyq boksshy Jánibek Álimhanulyna qatysty resmı sheshimin jarııalaǵanyn jazǵan edik.
