Jánibek Álimhanuly WBO chempıonymen jekpe-jekke qatysty pikir bildirdi
ASTANA.KAZINFORM — Jeńilip kórmegen qazaqstandyq kásipqoı boksshy Jánibek Álimhanuly WBO nusqasy boıynsha álem chempıony atanǵan brıtandyq Hamza Shırazben yqtımal jekpe-jekke qanshalyqty qyzyǵýshylyq tanytatynyn aıtty.
Álimhanulynyń aıtýynsha, WBO uıymy taǵaıyndaǵan Shırazben jekpe-jekte ony qarsylasynyń ózi emes, chempıondyq belbeýdi ıelený múmkindigi qyzyqtyrady.
— Ol meni qyzyqtyrmaıdy! Ol — tanymal boksshy emes. Maǵan odan tek chempıondyq tıtýl qajet. Al odan keıin WBC men WBO belbeýleri sarapqa salynatyn jekpe-jek bolady! Bul Jánibek pen Kanelonyń aıqasy bolady, — dedi Álimhanuly.
Aıta keteıik, qazaqstandyq boksshy men brıtandyq sportshy arasyndaǵy jekpe-jek ótý-ótpeýi ázirge belgisiz. Dúnıejúzilik boks uıymy (WBO) Álimhanulyn Shıraz ıelenip otyrǵan ekinshi orta salmaqtaǵy álem chempıony tıtýlyna mindetti úmitker retinde resmı túrde bekitken.
Taraptarǵa jekpe-jek boıynsha kelissóz júrgizýge 20 kún berilgen. Bul merzim 2026 jylǵy 3 qyrkúıekte aıaqtalady. Alaıda brıtandyq boksshynyń komandasy atalǵan jekpe-jekti ótkizýge qarsy bolyp otyr.
Buǵan deıin álem chempıony Hamza Shıraz WBO uıymynyń Jánibek Álimhanulymen jekpe-jek ótkizý týraly sheshimin synap, uıymdy jemqorlyqqa aıyptaǵan bolatyn.
Boksshy Saýl «Kanelo» Alvarespen nemese Hamza Shırazben judyryqtasýǵa daıyn ekenin aıtqan bolatyn.
