Jánibek Álimhanuly tıtýlynan aıyryla ma: ótpeı qalǵan jekpe-jekten keıingi bolashaǵy qandaı bolmaq

ASTANA. KAZINFORM – Boks sholýshysy jáne ınsaıder Býg Ýılıams WBO/IBF tujyrymdary boıynsha orta salmaqtaǵy álem chempıony qazaqstandyq Jánibek Álimhanulynyń jańazelandııalyq boksshy Andreı Mıhaılovıchpen jekpe-jegi ótpeı qalǵannan keıin, tıtýldarynan nege aıyrylmaǵanyn túsindirdi, dep habarlaıdy Sports.kz.

Álimhanuly men Mıhaılovıch 14 shildede Las-Vegasta jekpe-jekke shyǵýy tıis edi, biraq Jánibek jekpe-jek qarsańynda salmaq qýý barysynda qatty álsirep, aýrýhanaǵa túsken. Osydan keıin qarsylas tarap «Qazaq stılin» beldiginen aıyryp, Jánibekten tartyp alynǵan bos tıtýldy ıemdenýge tyrysatynyn  málimdedi.

— IBF/WBO-nyń Jánibekti ataǵynan aıyrmaýynyń nemese joǵary sanatqa ótýge májbúrleýiniń sebepteri bar ma?

«Bul jerde medıtsınalyq sebepter boıynsha bosatylyp otyr. Sonymen qatar, ol resmı túrde salmaq ólsheý rásiminen ótken joq, sondyqtan olar ony tıtýldarynan aıyra almaıdy. Ol sporttyq jolyn jalǵastyrmas buryn orta salmaqta bolý úshin medıtsınalyq tekserýden ótýi tıis», — dep jaýap berdi Ýılıams.

Aıta keteıik, Jánibek Álimhanuly aýrýhanaǵa túskennen keıin aldaǵy ýaqytta da orta dıvızıondaǵy jarysty jalǵastyrýǵa nıetti ekenin málimdegen bolatyn. Onyń menedjeri Egıs Klımas boksshynyń endi dıetolog jaldap, salmaq joǵaltýǵa jaýapkershilikpen qaraıtynyn qosa aıtty.

Eske sala keteıik, Jánibek Andreı Mıhaılovıchke qarsy ótetin jekpe-jek aldynda esinen tanyp qalǵan bolatyn.

Artynsha promoýter Jánibek Álimhanulynyń aýrýhanaǵa túsip qalýyna qatysty málimdeme jasady.

Keıin Jánibek ózi jaǵdaıy týraly jazba jarııalady.

Jánibek Álimhanulynyń qarsylasy Mıhaılovıch ótpeı qalǵan jekpe-jek týraly renishin bildirgen edi.

Sheteldik jankúıerler Jánibek Álimhanulyn jazalaýdy talap etkenin de jazǵan bolatynbyz.