Jánibek Álimhanuly Shırazdyń tıtýlyna talasatynyn málimdedi
ASTANA. KAZINFORM — Qazaqstandyq boksshy Jánibek Álimhanuly (17-0, 12 KO) qazir brıtandyq Hamza Shırazǵa (24-0-1, 19 KO) tıesili WBO nusqasy boıynsha sýperorta salmaqtaǵy álem chempıony belbeýin jeńip alýdy kózdep otyr, dep habarlaıdy Sports.kz.
— Ol meniń jaýym emes. Maǵan tek onyń tıtýly kerek. Munda jeke bastyń eshqandaı máselesi joq, — degen Álimhanuly Shırazben birge túsken sýretin X áleýmettik jelisindegi paraqshasynda jarııalady.
Eske salaıyq, tamyz aıynda Dúnıejúzilik boks uıymy (WBO) Hamza Shırazǵa tıtýlyn Jánibek Álimhanulymen jekpe-jekte qorǵaýdy mindettegen edi. Belgilengen merzim ishinde boksshylardyń komandalary jekpe-jek ótkizý týraly kelisimge kele almady. Osydan keıin jekpe-jek promoýterlik saýdaǵa shyǵaryldy.
Buǵan deıin Jánibek Álimhanuly WBO chempıonymen jekpe-jekke qatysty pikir bildirip, Hamza Shırazben yqtımal jekpe-jekke qanshalyqty qyzyǵýshylyq tanytatynyn aıtqan bolatyn.
