Jánibek Álimhanuly resmı túrde álem chempıony tıtýlynan aıyryldy
ASTANA. KAZINFORM — Halyqaralyq boks federatsııasy (IBF) qazaqstandyq boksshy Jánibek Álimhanulynyń orta salmaqtaǵy álem chempıony tıtýlyn alyp tastaý týraly qatań sheshim qabyldady.
2026 jylǵy 10 naýryz keshke IBF hatshylyǵynan Qazaqstannyń kásipqoı boks federatsııasyna resmı habarlama keldi. Hatta Álimhanulynyń IBF nusqasy boıynsha álem chempıony tıtýlynan aıyratyndyǵy aıtylǵan.
— Búgin bir saǵat buryn IBF sheshimi keldi. IBF uıymynyń qatal erejeleri bar, hatynda soǵan silteme jasalǵan. Hatqa sáıkes, Jánibek Álimhanuly 2026 jylǵy 2 jeltoqsanǵa deıin shettetiledi. Sondaı-aq, erejeler boıynsha árbir chempıon óz belbeýin toǵyz aı ishinde qorǵaýy tıis, ıaǵnı Jánibek ony 2026 jylǵy 4 shildege deıin qorǵaýy qajet, — dedi Qazaqstan kásipqoı boks federatsııasynyń prezıdenti Rahymjan Erdenbekov.
Týyndaǵan jaǵdaıǵa baılanysty 2026 jylǵy 5 naýryzda IBF Dırektorlar keńesi chempıondyq tıtýldy bos dep jarııalaý týraly sheshim qabyldady. Erdenbekov hattyń skrınshottaryn da kórsetti.
Sonymen qatar, Erdenbekovtiń aıtýynsha, Jánibek apellıatsııaa tapsyra alady.
— Men Federatsııa prezıdenti retinde bul jaǵdaı Jánibektiń komandasyna úlken sabaq boldy dep esepteımin. Degenmen ol bıylǵy jyly rıngke qaıta oralyp, burynǵydan da myqty bolyp, aldaǵy ýaqytta tórt álemdik belbeýdiń barlyǵyn jeńip alady. Komandasy da bul is boıynsha apellıatsııa beredi, — dep túıindedi Erdenbekov.
Buǵan deıin Kamıl Gadjıev Jánibek Álimhanulynyń álem chempıony tıtýlynan aırylýy múmkin ekenin aıtyp ótken bolatyn.
Aıta keteıik, WBO uıymy Álimhanulynyń álem chempıony tıtýlyn saqtap qaldy, biraq ony bir jylǵa dıskvalıfıkatsııalady.