Jánibek Álimhanuly men Laranyń jekpe-jegi resmı túrde toqtatyldy

ASTANA.KAZINFORM — Orta salmaqta WBO jáne IBF tujyrymdary boıynsha álem chempıony bolyp turǵan Jánibek Álimhanuly (17-0, 12 KO) men WBA chempıony Erıslandı Lara (31-3-3, 19 KO) arasyndaǵy jyldyń basty jekpe-jegi resmı túrde ótpeıtini belgili boldy.

Bul týraly QR Boks federatsııasy da resmı aqparat taratty.

— 6 jeltoqsanǵa josparlanǵan aıqasqa úsh kún qalǵanda, Jánibek Álimhanulynyń testinen meldonıı anyqtalǵany belgili boldy. Jánibektiń eń mańyzdy jekpe-jegi toqtatyldy, — delingen habarlamada.

Aıta keteıik, bul týraly aqparatty alǵash bolyp The Ring jýrnalısi Maık Koppınger jazdy. Dál sol sátte máselanyń qanshalyqty kúrdeli ekeni belgisiz edi. Biraq 20 mınýt ótpeı jatyp ESPN tilshisi Den Rafael jaǵdaıdyń óte aýyr ekenin rastady.

Ol VADA uıymynyń resmı hatyn jarııalap, onda Jánibektiń tyıym salynǵan zatqa «ekinshi úlgide» (qaıta tapsyrǵan testte) oń nátıje kórsetkeni aıtylady.

Keıin Jánibektiń ózi dopıng qoldanǵanyn joqqa shyǵaryp, «Men árqashan taza sport úshin kúreskenmin, bárińiz buny jaqsy bilesizder. Jańalyqty oqyǵanda qatty tańǵaldym. VADA alǵashqy testtiń taza ekenin aıtty. Men eshqandaı dárýmen qabyldaý tártibin ózgertpedim. Ekinshi testte ne bolǵanyn bilmeımin, sondyqtan tolyq qaıta tekserýdi talap ettim», — dep jazdy ol óziniń H paraqshasynda.

Al qazir uıymdastyrýshylar Laraǵa basqa qarsylas taýyp úlgergen. Jekpe-jek toqtatylǵan soń, Laraǵa shuǵyl túrde jańa qarsylas belgilendi. Onyń ornyna venesýelalyq Iohan Gonsales (36-4, 34 KO) shyǵatyn boldy.

Ol bıyl 1 naýryzda birinshi orta salmaqta burynǵy álem chempıony Djarrett Herdti jeńip, sensatsııa jasaǵan edi. Al Herd kezinde Erıslandı Larany utqan.

Esterińizge sala ketsek, Jánibektiń dopıng synamasynan qandaı tyıym salynǵan zat tabylǵany belgili boldy.

Dopıng daýyna baılanysty WBO ishki tergeý protsesin bastaıdy.