Jánibek Álimhanuly Kroýfordpen qashan kezdesedi

ASTANA. KAZINFORM – Orta salmaqta WBO jáne IBF tujyrymdary boıynsha álem chempıony, qazaqstandyq boksshy Jánibek Álimhanuly amerıkalyq juldyz Terens Kroýfordpen jekpe-jek ótkizý múmkindigi týraly pikir bildirdi.

32 jastaǵy qazaqstandyq bylǵary qolǵap sheberi Instagram paraqshasynda Kroýfordpen kezdesý shynaıy josparǵa aınalyp kele jatqanyn málimdedi.

- Boks jankúıerlerin jańa, áserli aıqas kútip turǵan sııaqty – Jánibek pen Kroýford! Bul týraly bári aıtyp jatyr. Eger bári oıdaǵydaı bolsa, jekpe-jek kelesi jyly ótýi múmkin. Meniń oıymsha, myqtylar árdaıym myqtylarmen qolǵap túıistirýi kerek, – dep jazdy Jánibek Álimhanuly.

Eske sala ketsek, 38 jastaǵy Terens Kroýford úsh túrli salmaq dárejesinde absolıýtti chempıon atanǵan tuńǵysh boksshy. Ol sońǵy kezdesýinde 35 jastaǵy meksıkalyq Saýl Kanelo Alvaresti jeńip, ekinshi orta salmaqta absolıýtti chempıon ataǵyn ıelendi. Kroýford komandasy buǵan deıin basqa salmaqtarda da jańa jekpe-jekter ótkizýge daıyn ekenin málimdegen, alaıda aıqas absolıýtti chempıondyq belbeýler úshin ótýi kerek.

Qazirgi tańda Jánibektiń qorjynynda tórt chempıondyq belbeýdiń ekeýi WBO jáne IBF tıtýldary bar. Ol birneshe márte qalǵan eki belbeýdi, ıaǵnı WBC jáne WBA tujyrymdaryn biriktirip, absolıýtti chempıon atanýǵa degen nıetin bildirgen.

WBC chempıony, 31 jastaǵy domınıkandyq Karlos Adamespen kelissózder nátıje bermegen soń, Álimhanulynyń komandasy WBA nusqasy boıynsha álem chempıony, 42 jastaǵy kýbalyq Erıslandı Laramen aıqas ótkizýdiń sáti túskenin habarlady.

Qazaqstandyq sportshynyń ókili Berik Sultan áleýmettik jelidegi paraqshasynda bul kelisim týraly bylaı dep jazdy:

– Barlyq qazaqstandyqtar kútken tarıhı ári keremet aıqasqa kelisimshartqa qol qoıyldy. Aldaǵy kúnderi promoýterlik kompanııalar resmı habarlama jasaıdy. Orta salmaqta naǵyz dúr silkindiretin shoý bolǵaly tur, – dedi ol.

Eger bul aqparat resmı túrde rastalsa, Jánibek Álimhanuly úshinshi chempıondyq belbeýge talasýǵa múmkindik alady. Bul jeńis ony absolıýtti chempıon mártebesine bir qadam jaqyndatyp, Kroýfordpen jekpe-jek ótkizýge negiz bolady.

Buǵan deıin Jánibek Álimhanuly úsh belbeý sarapqa salynatyn tarıhı jekpe-jekke qol qoıǵanyn jazǵanbyz.