Jánibek Álimhanuly kezekti jekpe-jegine daıyndyǵyn bastady
ASTANA.KAZINFORM – Qazaqstandyq kásipqoı boksshy Jánibek Álimhanuly (17-0, 12KO) kezekti jekpe-jegine qarsy daıyndyǵyn bastady.
Orta salmaqtaǵy WBO nusqasy boıynsha álem chempıony áleýmettik jelide jattyǵý jasap jatqan vıdeosyn jarııalap, «Bastadyq» dep jazdy.
Osyǵan deıin habarlaǵandaı, Búkilálemdik boks uıymy (WBO) Jánibek Álimhanulyna tyıym salynǵan meldonıı zaty boıynsha oń nátıje kórsetken dopıng synamasyna baılanysty osy jyldyń 2 jeltoqsanyna deıin bir jyl merzimge jarystardan shettetý jazasyn qoldandy.
Uıymnyń sheshimine sáıkes, qazaqstandyq boksshy chempıondyq ataǵy saqtaldy. Al shettetý merzimi aıaqtalǵannan keıin Jánibek Álimhanuly ýaqytsha chempıonmen mindetti túrde jekpe-jek ótkizýge tıis.
Domınıkanalyq boksshy, orta salmaqtaǵy WBC tujyrymy boıynsha álem chempıony Karlos Adames qazaqstandyq Jánibek Álimhanulymen biriktirýshi jekpe-jek ótkizgisi keletinin jarııalaǵan bolatyn.
