Jánibek Álimhanuly kezekti qarsylasymen kóz arbasty
ASTANA. KAZINFORM - Orta salmaqta WBO jáne IBF nusqasy boıynsha álem chempıony, qazaqstandyq kásipqoı boksshy Jánibek Álimhanuly (16-0, 11KO) kezekti jekpe-jegi aldynda baspasóz konferentsııasyn ótkizdi.
Baspasóz konferentsııasy Astanadaǵy Rixsos qonaqúıinde ótti. Oǵan frantsııalyq qarsylasy Anaýel Ngamıssengýe (14-0, 9KO) jáne boks keshi anderkartynda sharshy alańǵa shyǵatyn qazaqstandyq boksshylar Balaýsa Muzdyman, aǵaıyndy Sabyrhandar, Batyr Júkembaev, Sultan Zaýyrbek qatysty.
Baspasóz konferentsııasy barysynda Jánibek jýrnalıster suraǵyna jaýap berip, aldaǵy aıqasynda jankúıerler úshin este qalarlyqtaı shoý kórsetýge ýáde berdi. Sońynda Jánibek Álimhanuly qarsylasy Anaýel Ngamıssengýemen alǵash ret betpe-bet kelip, kóz arbasty.
Eske sala ketsek, Jánibek Álimhanuly 5 sáýir kúni Astana qalasynda kezekti jekpe-jegin ótkizip, chempıondyq beldikterin qorǵaıdy.
Osyǵan deıin habarlaǵanymyzdaı, Jánibek-Anaýel aıqasy anderkardy tolyq anyqtaldy.
Keshe boksshylar elordadaǵy Hanshatyr saýda ortalyǵynda jankúıerler úshin ashyq jattyǵý ótkizgen edi.