Jánibek Álimhanuly «Kanelomen» biriktirýshi jekpe-jek ótkizetin ýaqytyn atady
ASTANA. KAZINFORM — Qazaqstandyq boksshy Jánibek Álimhanuly (17-0, 12 KO) ekinshi orta salmaqtaǵy chempıondyq belbeýlerdi biriktirý jekpe-jegin 2027 jylǵy mamyrda ótkizgisi keletinin málimdedi, dep habarlaıdy Sports.kz.
Jánibek Álimhanuly H áleýmettik jelisindegi paraqshasynda Saýl «Kanelo» Alvares pen Krıstıan Mbıllı arasyndaǵy jekpe-jektiń posterin jarııalap, osy kezdesýdiń jeńimpazymen judyryqtasýǵa nıetti ekenin bildirdi.
— Qańtarda men ekinshi orta salmaqta chempıondyq belbeýdiń ıegeri bolamyn. Mamyrda osy jekpe-jektiń jeńimpazymen kezdesip, tıtýldardy biriktirgim keledi, — dep jazdy Jánibek Álimhanuly.
In January, I will hold the championship title in the super middleweight division. In May, I want to fight the winner of this fight and unify the title. https://t.co/X0HnrnFQXs
— Janibek Alimkhanuly (@qazaqstyle) October 29, 2026
Meksıkalyq Alvares pen Mbıllı arasyndaǵy kezdesý 31 qazanda Saýd Arabııasynyń Er-Rııad qalasynda ótedi dep josparlanǵan. Bul jekpe-jekte ekinshi orta salmaqtaǵy WBC chempıondyq belbeýi sarapqa salynady.
Al Álimhanuly 2027 jyly 23 qańtarda Danııanyń Horsens qalasynda jergilikti boksshy ıAkob Bankpen kezdesedi. Olar ekinshi orta salmaqtaǵy bos turǵan WBO álem chempıony ataǵyn sarapqa salady.
Eske salaıyq, 2025 jyldyń sońynda Jánibek Álimhanulynyń dopıng-synamasynan tyıym salynǵan meldonıı anyqtalyp, sonyń saldarynan Erıslandı Laramen josparlanǵan chempıondyq belbeýlerdi biriktirý jekpe-jegi ótpeı qalǵan edi. 2026 jylǵy aqpanda WBO qazaqstandyq boksshyny 2025 jylǵy 2 jeltoqsannan bastap bir jylǵa shettetti. Al naýryzda IBF belgilengen merzimde mindetti jekpe-jegin ótkize almaıtyn bolǵandyqtan, odan chempıondyq belbeýin tartyp aldy. Keıin boksshy qoıylǵan talaptardy oryndaǵan soń, WBO shettetý merzimin merziminen buryn toqtatyp, Jánibek Álimhanulyna 2026 jylǵy 10 shildeden bastap sharshy alańǵa oralýǵa múmkindik berdi.
Sondaı-aq Álimhanuly orta salmaqtan (72,6 kelige deıin) ekinshi orta salmaqqa (76,2 kelige deıin) aýysý týraly sheshim qabyldady. Jańa salmaq dárejesinde óner kórsetý úshin ol ózinde qalǵan WBO chempıondyq belbeýinen óz erkimen bas tartty. ıAkob Bankpen ótetin jekpe-jek Jánibektiń ekinshi orta salmaqtaǵy alǵashqy kezdesýi ári osy salmaqta álem chempıony atanýǵa berilgen múmkindik bolmaq.
Buǵan deıin qazaqstandyq kásipqoı boksshy Nıý-Iorktegi áıgili Gleason’s Gym boks zalyna bardy. Amerıkalyq bapker Don Seksbı Jánibek Álimhanulyna joǵary baǵa berip, onyń qarapaıymdylyǵyna tánti bolǵan edi.
