Jánibek Álimhanuly IBF tıtýlynan aıyrylǵannan keıin málimdeme jasady

ASTANA. KAZINFORM – Boksshy Jánibek Álimhanuly orta salmaqtaǵy IBF tıtýlynan aıyrylǵannan keıin jazba jarııalady.

Boksshy qıyndyqtan soń qýanysh bolatynyna senetinin jáne segiz aıdan soń sharshy alańǵa oralatynyn jetkizdi.

– Synaldyq, biraq synbadyq. Kerisinshe, shyńdaldyq! Sheshimder shyqty, IBF ketti, WBO qaldy. Qalaı bolǵanda da qazir men WBO nusqasy boıynsha orta salmaqta álem chempıonymyn. 1 tıtýl saqtaldy. Allaǵa shúkir. Buıyrtsa 8 aıdan soń sharshy alańǵa shyǵamyn. Úlken joryq jalǵasady. Biz áli aıaqtamadyq, menińshe bári endi bastalatyn sııaqty. Kásipqoı boks bireýler úshin sport bolsa, keıbireýler úshin tek bıznes. Biz sport jaǵyndamyz. Biz qazaqylyq baǵytyndamyz. Qazanattyń jolynda jazyq ta bar or da bar, azamattyń jolynda baqyt ta bar sor da bar. Bul ómir zańy! Ár qıyndyqtan soń qýanysh baryn umytpaımyz! – deıdi boksshy.

Sportshy ózine qoldaý kórsetken jankúıerlerge alǵys bildirdi.

– Men dopıngke qarsymyn. Muny buryn da aıtqanmyn, qazir de aıtamyn. Ótken nárse ótti, bitken nárse bitti. Talqylaı bergennen, ýaıymdaı bergennen taǵdyr ózgermeıdi. Eń bastysy el meniń kim ekenimdi, qandaı boksshy ekenimdi jaqsy biledi! Ardaqty aǵaıyn, biz áli álem chempıonymyz. Aldymyzda talaı dodalar kútip tur. Jeńisti kúnde júzdeseıik! Qoldaýlaryńyzǵa raqmet, - dedi Jánibek Álimhanuly.

Buǵan deıin Halyqaralyq boks federatsııasy (IBF) qazaqstandyq boksshy Jánibek Álimhanulynyń orta salmaqtaǵy álem chempıony tıtýlyn alyp tastaý týraly qatań sheshim qabyldaǵanyn jazǵan edik.