Jánibek Álimhanuly eki tıtýl úshin judyryqtasatyn jekpe-jek aldynda talyp qaldy
ASTANA. KAZINFORM — Qazaqstandyq boksshy, WBO/IBF tujyrymdary boıynsha orta salmaqtaǵy álem chempıony Jánibek Álimhanuly jańa zelandııalyq qarsylasy Andreı Mıhaılovıchke qarsy ótetin jekpe-jek aldynda talyp qaldy. Bul týraly Sports.kz jazdy.
Talksport.com-nyń jýrnalısi, ınsaıder Maıkl Benson WBO/IBF tujyrymdary boıynsha orta salmaqtaǵy álem chempıony Jánibek Álimhanuly men jańa zelandııalyq Andreı Mıhaılovıch arasyndaǵy jekpe-jek bolmaıtynyn habarlady.
«Jánibek Álimhanuly men Andreı Mıhaılovıch arasyndaǵy erteń keshke josparlanǵan jekpe-jek ótpeıtin boldy. Jánibek beısenbi kúni salmaq qýý kezinde aǵzaǵa sý jetispeýshiligi saldarynan talyp qalýyna baılanysty aýrýhanaǵa jatqyzyldy», - dep jazdy Benson X áleýmettik jelisindegi paraqshasynda.
Eske sala keteıik, Jánibek Álimhanuly men Andreı Mıhaılovıchtiń jekpe-jegi Las-Vegaste (AQSh) 13 shilde kúni túnde ótýi tıis edi.
Buǵan deıin Jánibek eki birdeı belbeýge talas aldynda «jyl nokaýtyna» ýáde bergenin jazǵan bolatynbyz.
