Jánibek Álimhanuly dopıng synamasyna qatysty málimdeme jasady

ASTANA. KAZINFORM - Qazaqstandyq kásipqoı boksshy Jánibek Álimhanuly dopıng daýy boıynsha V synamasynyń naqty nátıjesi shyǵardan buryn jankúıerlerge pikir bildirdi.

Bul jóninde boksshy óziniń áleýmettik jelidegi paraqshasynda jazdy.

- Qoldap jatqan sportshy baýyrlarym men jankúıerlerge erekshe alǵys aıtamyn. Sheteldikter daýǵa qýanyp jatqanda, óz qazaǵym olarǵa qosylmaı, jatqa jyǵyp bermeı, qasymnan tabylyp, taza ekenimizge senim bildirip jatqany janyńa demeý bolady eken. Meniń bir qýanatynym, boks mansabymda jaman jankúıer jınamappyn! Men qazaqqa bolysatyn, qazaq úshin jany aýratyn, qazaqqa jaqtasatyn jankúıer jınappyn. Meniń jankúıerlerim tek kók týdy jelbiretkende ǵana qasymnan tabylatyn emes, qıyndyqta da qoldaıtyn jankúıer eken! Bul túsine bilgenge sportshy úshin úlken baq, - dep jazylǵan habarlamada.

Aıta ketsek, WBO jáne IBF tujyrymdary boıynsha orta salmaqtaǵy álem chempıony Jánibek Álimhanuly jeltoqsan aıyndaǵy kezekti jekpe-jegi aldyndaǵy dopıng testinen ótpeı qaldy.

Ol jóninde sportshynyń ózi pikirin bildirdi.

- Men árqashan taza sportty qoldaımyn. Muny jaqsy bilesizder. Men taza sportty nasıhattap júrgenimdi de bilesizder, - dedi ol.

Osyǵan baılanysty orta salmaqta WBO jáne IBF tujyrymdary boıynsha álem chempıony bolyp turǵan Jánibek Álimhanuly (17-0, 12 KO) men WBA chempıony Erıslandı Lara (31-3-3, 19 KO) arasyndaǵy jyldyń basty jekpe-jegi resmı túrde ótpeıtini belgili boldy.

Osyǵan baılanysty uıymdastyrýshylar Laraǵa basqa qarsylas taýyp úlgergen. Jekpe-jek toqtatylǵan soń, Laraǵa shuǵyl túrde jańa qarsylas retinde venesýelalyq Iohan Gonsales (36-4, 34 KO) belgilendi.

Jánibek Álimhanuly 1993 jyly 1 sáýirde dúnıege kelgen. Áýesqoı boksta 2013 jyly álem chempıony ataǵynyp, sol jyly Azııa chempıonatynda jeńis tuǵyryna kóterildi.