Jánibek Álimhanuly dıskvalıfıkatsııany joıýdy talap etti: WBO sheshimin aıtýy tıis
ASTANA. KAZINFORM — Qazaqstandyq boksshy Jánibek Álimhanuly dopıng isi boıynsha taǵaıyndalǵan dıskvalıfıkatsııadan qutylý úshin jańa qadam jasady.
Orta salmaqta WBO nusqasy boıynsha álem chempıony Jánibek Álimhanuly men onyń komandasy rıngke oralý protsesin jedeldetý maqsatynda Dúnıejúzilik boks uıymyna (WBO) resmı túrde apellıatsııa joldady. Olar dıskvalıfıkatsııa merzimin qysqartýdy nemese tolyqtaı alyp tastaýdy surap otyr. Bul jaza onyń qanynan antıdopıng kodeksimen tyıym salynǵan meldonıı zaty anyqtalǵannan keıin taǵaıyndalǵan.
Qazirgi ýaqytta Álimhanuly WBO chempıony ataǵyn saqtap otyr, alaıda onyń dıskvalıfıkatsııasy bıylǵy jeltoqsanǵa deıin kúshin saqtaıdy. Tyıym salynǵan zat onyń byltyr jeltoqsanda WBA chempıony, kýbalyq Erıslandı Laramen ótetin jekpe-jekke birneshe kún qalǵanda tapsyrǵan synamasynan tabylǵan.
WBO ókili Gýstavo Olıverı Boxeo Urbano Network basylymyna bergen suhbatynda:
— Jánibek pen onyń komandasy dıskvalıfıkatsııaǵa apellıatsııa berdi, qazir ol qaralyp jatyr. Olar bul sheshimmen kelispeıdi jáne ony qaıta qaraýǵa tolyq quqyly. Uıym ishinde arnaıy apellıatsııalyq komıssııa bar, onyń quramyna zańgerler men lıtsenzııalanǵan mamandar kiredi. Sońǵy sheshimdi solar qabyldaıdy, — dedi.
Álimhanulynyń komandasy bul isti qaıta qaraýdy talap etip otyr. Bul orta salmaqtaǵy jaǵdaıǵa aıtarlyqtaı áser etýi múmkin. Olıverıdiń aıtýynsha, WBO-nyń tıisti komıteti apellıatsııany qarap jatyr, sonymen qatar dıvızıondaǵy turaqtylyqty saqtaý úshin ýaqytsha chempıondyq júıe engizilgen.
— Qorytyndy sheshimdi kútýimiz kerek. Dıskvalıfıkatsııa ózgerissiz qalýy, qysqarýy nemese tolyqtaı joıylýy múmkin, — dedi ol.
Jánibektiń ýaqytsha shettetilýine baılanysty WBO aralyq chempıondyq tıtýl engizdi. Bul múmkindikti brıtandyq boksshy Denzel Bentlı tıimdi paıdalanyp, Endrı Saavedrany jeńip, ýaqytsha WBO chempıony atandy.
Qazirgi tańda uıym Bentlı men reıtıngte ekinshi orynda turǵan kýbalyq boksshy Ioenlıs Ernandes arasynda jekpe-jek uıymdastyrýdy qarastyryp jatyr. Alaıda aldymen Bentlıge erikti túrde tıtýl qorǵaý múmkindigi berilýi múmkin — bul usynys qazir qaralyp jatyr.
— Men chempıonat komıtetine Ernandesti Bentlıdiń mindetti qarsylasy retinde bekitýdi usynamyn. Sebebi sońǵy eki jylda mindetti qorǵanys jekpe-jegi ótkizilgen joq, sondyqtan bul talap oryndalýy tıis, — dedi Olıverı.
Eger Álimhanulynyń apellıatsııasy qanaǵattandyrylyp, dıskvalıfıkatsııa qysqartylsa nemese tolyq joıylsa, WBO qazaqstandyq chempıon men Bentlı arasynda tikeleı jekpe-jek uıymdastyrýy múmkin. Bul jaǵdaıda Ernandes kelesi mindetti úmitker retinde qala beredi.
Qazirgi ýaqytta apellıatsııa nátıjesi búkil dıvızıondaǵy jaǵdaıǵa tikeleı áser etetin negizgi faktorǵa aınalyp otyr. Uıym chempıonattyń belsendiligi men básekelestigin saqtaý úshin barlyq protsesterdi úılestirip keledi.
Aıta keteıik, tergeý nátıjesinde Álimhanuly IBF nusqasy boıynsha álem chempıony ataǵynan aıyryldy, alaıda WBO tıtýlyn saqtap qaldy.
