Jánibek Álimhanuly álemniń úzdik boksshylary reıtınginde «Kanelodan» ozdy
ASTANA. KAZINFORM — Qazaqstandyq boksshy Jánibek Álimhanuly jańartylǵan álemniń úzdik boksshylary reıtınginde (P4P) meksıkalyq Saýl «Kanelo» Alvaresten joǵary tur, dep habarlaıdy Sports.kz.
WBO orta salmaqtaǵy chempıon ataǵyn ıelengen Álimhanuly reıtıngte altynshy orynǵa jaıǵasqan, al «Kanelo» segizinshi orynda. Qazaqstan boksshysy reıtıngtiń aldyńǵy nusqasynda besinshi orynda bolǵan, biraq reseılik jartylaı aýyr salmaq dárejesindegi Dmıtrıı Bıvol ony artta qaldyrdy.
Jánibektiń kásibı rekordy áli de minsiz — 17 jeńis, onyń 12-si nokaýtpen. Sońǵy jekpe-jeginde ol 2025 jylǵy sáýirde frantsýz boksshysy Anaýel Ngamıssengeni tehnıkalyq nokaýtpen jeńgen. Qazirgi ýaqytta Álimhanuly oń dopıng-test nátıjesine baılanysty jarystardan ýaqytsha shettetilgen, biraq WBO onyń álem chempıony mártebesin saqtap otyr.
Saýl «Kanelo» Alvares bolsa, amerıkalyq Terens Kroýfordan jeńilip, sýperorta salmaqtaǵy barlyq chempıondyq ataqtaryn joǵaltqannan keıin rıngke oralýǵa daıyndalyp jatyr. 2025 jylǵy qyrkúıekte «Kanelo» tóreshilerdiń bir daýyspen qabyldaǵan sheshiminen keıin jeńilgen, sol oqıǵadan soń shyntaǵyna ota jasatyp, demalys alǵan.
Boxing Metrics reıtıngindegi P4P top-10:
- Naoıa Inoýe — 33-0
- Aleksandr Ýsık — 24-0
- Terens Kroýford — 42-0
- Shakýr Stıvenson — 25-0
- Dmıtrıı Bıvol — 24-1
- Jánibek Álimhanuly — 17-0
- Djaı Opetaıa — 30-0
- Saýl «Kanelo» Alvares — 63-3-2
- Davıd Benavıdes — 32-0
- Djessı Rodrıges — 23-0
Aıta keteıik, Jánibek Álimhanuly buǵan deıin domınıkanalyq bylǵary qolǵap sheberi Karlos Adamestiń jekpe-jek ótkizgisi keletin málimdesine áleýmettik jelidegi paraqshasynda jaýap bergen bolatyn.
