Jánibek Álimhanuly álem chempıony ataǵynan óz erkimen bas tartty
ASTANA. KAZINFORM — Qazaqstandyq kásipqoı boksshylar arasynda endi álem chempıony ataǵyn ıelenip júrgen sportshy qalmady.
Osy ýaqytqa deıin Qazaqstannyń jalǵyz álem chempıony Jánibek Álimhanuly bolatyn. Alaıda 2026 jyly 21 shildede ol bul mártebeden óz erkimen bas tartty. WBO qazaqstandyq boksshynyń chempıondyq belbeýden bas tartý týraly ótinishin maquldady.
Uıymnyń sheshimine sáıkes, Jánibek Álimhanulynyń orta salmaqtaǵy WBO tujyrymy boıynsha álem chempıony ataǵynan óz erkimen bas tartýy qabyldandy. Osyǵan baılanysty ýaqytsha chempıon bolǵan Denzel Bentlı tolyqqandy álem chempıony atandy. Al orta salmaqtaǵy mindetti úmitker mártebesi Ioenlı Ernandeske berildi.
Jánibek Álimhanuly orta salmaqtaǵy chempıondyq ataqtan bas tarta otyryp, WBO-dan ózin ekinshi orta salmaq dárejesindegi álemdik reıtıngke engizýdi surady. Osylaısha, ol mansabyn budan bylaı osy salmaqta jalǵastyrýdy josparlap otyr.
Qazir onyń salmaq dárejesin aýystyrý jáne ekinshi orta salmaq boıynsha álemdik reıtıngke engizý týraly ótinishin WBO-nyń reıtıng komıteti qarap jatyr.
Uıymnyń málimdeýinshe, komıtet sheshim qabyldaý kezinde WBO nusqasy boıynsha orta salmaqtaǵy álem chempıony retindegi burynǵy mártebesi men jetistikterin qosa alǵanda, barlyq mańyzdy dúnıeni uıym reglamentine sáıkes eskerýge quqyly.
Óziniń ekinshi orta salmaqqa aýysý týraly sheshimin Jánibek Álimhanuly áleýmettik jelide qysqasha túsindirdi.
— Ótken nárse ótti. Men ótkenmen ómir súrmeımin. Boks jolyndaǵy tarıhym burynǵydan da qyzyq bolaıyn dep tur. Jańalyqtardy kútińizder, — dep jazdy ol Instagram paraqshasynda.
Qazir WBO tujyrymy boıynsha ekinshi orta salmaqtaǵy álem chempıonynyń belbeýi bos tur. Buǵan deıin uıym bul tıtýl úshin Hamza Shıraz ben Dıego Pacheko judyryqtasýy tıis degen sheshim shyǵarǵan.
Eske salsaq, Jánibek Álimhanuly 2025 jyldyń jeltoqsanynan beri synamasynan Dúnıejúzilik dopıngke qarsy kodekste tyıym salynǵan zat anyqtalǵandyqtan, bir jylǵa jarystardan shettetilgen. Soǵan qaramastan WBO ol chempıondyq belbeýden óz erkimen bas tartqanǵa deıin onyń ataǵyn saqtap keldi. Al IBF osy jaǵdaıǵa baılanysty buǵan deıin Álimhanulyn chempıondyq tıtýlynan aıyrǵan bolatyn.
