Jańajyldyq otshashýlardy tamashalaý aqyly bolmaq
ASTANA. QazAqparat - London merııasy bıylǵy jyldan bastap jańajyldyq otshashýlardy qyzyqtaǵysy keletinder úshin ony aqyly etpek, dep habarlaıdy RIA Novostı.
«Ótken jylǵy jańajyldyq otshashýdy tamashalaýǵa adamdardyń óte kóp jınalǵandyǵy sonshalyq, bul kólik ınfraqurylymy men qaýipsizdikti qamtamasyz etý qurylymdaryna asa úlken salmaq túsirdi. Apattan qutqarý qyzmetteri men Transport for London kólik kásiporyndarymen keńesken soń biz bul sharany osylaısha uıymdastyrýdy jón kórdik», - dep habarlady merııa ókili.
Endi áıgili otshashýlardy tamashalaǵysy keletinderdiń sany 100 myń adamǵa deıin shektelmek. Salystyrý úshin aıta ketelik, ótken jyly salıýtti tamashalaý úshin Temza ózeniniń jaǵasyna jarty mıllıonǵa jýyq kórermen jınalǵan bolatyn.
Feıerverk bıletteri 10 fýnt sterlıngten satylmaq. Onyń satylymy 26 qyrkúıekte bastalady. Bir adamnyń qolyna tórt bıletten artyq bılet satylmaıdy. «Londondaǵy jańajyldyq otshashýlar álemge áıgili, sondyqtan biz onyń qaýipsiz ári tańǵajaıyp bolyp qala bergenin qalaımyz», - dedi London qalasynyń basshysy Borıs Djonson.
