Jańajyldyq mereke kúnderi Petropavlda polıtseıler aıazdan 48 adamdy qutqardy
PETROPAVL. QazAqparat – Petropavlda qatty aıazǵa baılanysty turǵylyqty mekeni joq adamdar anyqtalyp, qabyldap-taratý ornyna jetkizildi, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, jańajyldyq mereke kúnderi SQO-da aıaz kúsheıip, Petropavl qalalyq polıtsııa basqarmasynyń qabyldap-taratý orny qyzmetkerleriniń jumysy qyza tústi. Olardyń basty maqsaty - turǵylyqty jeri joq adamdardyń úsik alýyna jol bermeý.
Jeltoqsan aıynyń sońy jáne jańa jyldyń alǵashqy kúnderi baspanasy joq adamdardy izdestirý jumystary kúsheıtildi. Jertóleler, jylý jelileriniń qudyqtary, káriz júıesi, qoqys oryndary, bazarlar, vokzaldar - polıtseıler qańǵybastardyń júretin jerlerin tekserdi.
31 jeltoqsan kúni polıtseıler qabyldap-taratý ornyna 48 adamdy jetkizdi. Qysta mundaǵy túneý orny turǵylyqty jeri joq adamdar úshin saǵat 18.00-den tańǵy 10.00-ge deıin jumys isteıdi. Olarǵa munda jatatyn orynnan bólek ystyq tamaq beriledi.
«Árbir jetkizilgen adam fotoǵa túsirilip, saýsaq izderi alynady, esepke alý bazalary boıynsha tekseriledi. Ótken jyly qyzmetkerler qabyldap-taratý ornyna qańǵybastardy 2565 ret jetkizgen. Olardyń ishinen izdeýdegi - 8, iz-túzsiz joǵalǵan 2 adam anyqtaldy», - deıdi qabyldap-taratý ornynyń bastyǵy Adaı Smaıyl.
