Jańajyldyq kesh ótkizetin astanalyq meıramhana ıelerine qaýipsizdik erejesi túsindirildi
«Jyl saıyn dástúrge saı biz polıtsııa departamentimen birlesip jańa jyl qarsańynda qaýipsizdik erejelerin qala turǵyndary men qonaqtarynyń esine taǵy salǵymyz keledi. Búginde elordada «Qaýipsiz jańa jyl» atty aktsııa ótip jatyr. Maqsaty – aty aıtyp turǵandaı halyq arasynda qaýipsizdikti nasıhattap, bolýy múmkin tótenshe jaǵdaılardyń aldyn alý. Atalǵan aktsııa barysynda qaladaǵy densaýlyq saqtaý mekemeleri men tamaqtaný oryndarynyń basshylarymen onlaın jıyn ótti. Ol jıynda mereke qarsańynda qaýipsizdik erejelerin qaıta pysyqtap, saq bolý kerektigi basa aıtyldy. Ózderińiz biletindeı, qazir qaladaǵy dámhana men meıramhanalar jańajyldyq kesh ótkizip jatyr. Osy oraıda biz olardy aralap órt qaýipsizdiginiń saqtalýyn tekserip, jadynama tarattyq», - dedi Nur-Sultan qalasy tótenshe jaǵdaılar departamenti memlekettik órtti baqylaý basqarmasynyń basshysy Erkin Otarǵalymuly elorda ákimdiginde onlaın ótken baspasóz máslıhatynda.
Sondaı-aq, TJD ókili balalarǵa abaı bolý kerektigin aıta kele, olardy qaraýsyz qaldyrmaýǵa shaqyrdy.
«Jańa jyl shyrsha men túrli otshashýsyz ótpeıtini belgili. Osy oraıda turǵyndardy saq bolýǵa shaqyramyz. Gırlıandany toqqa qosqan kezde de elektrdiń qalaı jalǵanǵanyn teksergen jón. Otshashýdy úıde nemese balkonda atýǵa bolmaıdy. Satyp alǵanda da ruqsaty bar dúkennen alǵan durys. Sonymen qatar otshashýdy balalardan aýlaq ustaǵan abzal», - deıdi ol.
Onyń aıtýynsha, 2018 jyldan beri elordada otshashýdyń saldarynan 5 zardap shegýdiń jaǵdaıy tirkeldi.
