Jańajol ken ornyndaǵy órt kezinde kúıik shalǵan taǵy bir jumysshy kóz jumdy
Jańajol ken ornyndaǵy gaz zaýytynan órt shyqqan kezde barlyǵy 4 jumysshynyń kúıik shaldy.
Olar aldymen aýyldyq aýrýhanada em qabyldap, keıin sanavıatsııamen Aqtóbege, ári qaraı Astanaǵa jiberildi.
Úsheýi búginge deıin elordada em qabyldaǵanymen, keshe kúndiz bireýi kóz jumdy. Al búgin taǵy bir naýqastyń qaıtys bolǵany habarlandy.
«Naýqas Myrzaly Qýanshalıev 51 jasta. Ol 6 mamyr kúni Astanaǵa jiberilip, emdi sol jerde qabyldady. Al 14 mamyr kúni keshki saǵat 22:55-te qaıtys boldy. Onyń denesiniń 70% kúıik shalǵan. Tynys alý joldaryna da zaqym kelgen. Júrek-qan tamyrlary, tynys alý joldary jáne búıregi syr berdi. Qaıǵyly jaǵdaı týraly týǵan-týystaryna habar berildi. Qazir sot-medıtsınalyq saraptama jasalyp jatyr. Al Astanada em alyp jatqan úshinshi naýqastyń jaǵdaıy turaqty. Sonymen birge bireýi Aqtóbe qalasyndaǵy aýrýhanada jatyr. Onyń da jaǵdaıy turaqty. Qaıtys bolǵan adamdardyń denesi ushaqpen jetkiziledi»,- dedi oblystyq densaýlyq saqtaý basqarmasynyń basshysy Rústem Isaev.
Eske salsaq, 1 mamyr kúni Jańajol munaı-gaz kesheninde órt shyǵyp, qyzyl jalyn 14 saǵat boıy sóndirildi.
Oqıǵa ornynda bolǵan 4 jumysshyny qatty kúıik shalyp, aýrýhanaǵa jetkizildi.
Qazirgi kezde osy oqıǵaǵa baılanysty qylmystyq is qozǵalyp, tergeý júrip jatyr.
Ázirge órttiń neden shyqqan belgisiz. Tek «SNPS-Aqtóbemunaıgaz» AQ-y resmı habarlamada munda jóndeý jumystary júrgizilgenin habarlady.
«Ákimdik tarapynan barlyq kómek berilip jatyr. Sonymen birge kompanııa da jábirlenýshilerdi qoldaıdy. Qujattary rettelgen soń deneni týǵan-týystarynyń ruqsatymen jetkizý qarastyrylyp jatyr», - dep habarlady oblys ákiminiń baspasóz qyzmeti.
