Jańajol ken ornyndaǵy órt 14 saǵatta sóndirildi

AQTÓBE. QazAqparat - «Jańajol» gaz óndeý zaýytyndaǵy órt keshe saǵat 15:55-te tutanyp, búgin saǵat 6:20-da sóndirildi. Qazir salqyndatý jumysy júrgizilip jatyr, dep habarlaıdy QazAqparat tilshisi.

Aqtóbe oblystyq TJD baspasóz qyzmetiniń habarlaýynsha, órt sóndirýshiler qyzyl jalynnyń 20 tonnalyq 5 tsısterna men basqa da obektilerge taralýyna jol bermedi. Órtpen kúres jumystaryn túnimen júrgizip, saǵat 6:20-da sóndirdi. Qazirgi tańda salqyndatý jumystary júrgizilip jatyr.
Eske sala keteıik, keshe saǵat 15:55-te (Aqtóbe oblysynyń ýaqyty boıynsha) 112 pýltine
«SNPS-Aqtóbemunaıgaz» AQ №2 gaz óńdeý zaýytynyń aýmaǵy, Muǵaljar aýdany Batpaqkól aýyldyq okrýginiń «Jańajol» ken ornynda qondyrǵy órtengeni týraly habarlama túsken. TJD basshylyǵy aerovızýaldy barlaý jumystaryn júrgizip, jedel shtab quryldy. Órtti sóndirýge Aqtóbe oblysy TJD jáne «Semser órt sóndirýshi» JShS-nen 50-den astam qyzmetker men 9 tehnıka jumyldyryldy.
Órttiń shyǵý sebebi men aýdany anyqtalyp jatyr. Kúıik shalǵan 4 jumysshy Temir aýdanynyń ortalyq aýrýhanasyna jatqyzyldy.

Aqtóbe oblystyq densaýlyq saqtaý basqarmasynyń basshysy Rústem Isaevtiń habarlaýynsha, órt kezinde kúıik shalǵan tórt naýqas qazir Keńqııaq aýyldyq aýrýhanasynda em qabyldap jatyr. 32 jastaǵy M. Isaevtiń denesin, 52 jastaǵy M. Qýanshalıevtiń beti men ıyǵyn, 56 jastaǵy R. Rysbekovtiń denesin, 53 jastaǵy B. Qoıshenovtiń qolyn ekinshi jáne úshinshi dárejede kúıik shalǵan. Dárigerler olardy qalaǵa jetkizý jaıyn qarastyrady.