Jańajol gaz óńdeý zaýytynda kúıik shalǵan jumysshylar oblys ortalyǵyna jetkizildi
«Kúıik shalǵan jumysshylardyń jaǵdaıy turaqty aýyr. Olar esin biledi. Bári de jansaqtaý bóliminde em qabyldap jatyr. Kúıik deńgeıi – І jáne ІІ. Sanavıtsııa jáne reanımobılmen qalaǵa jetkizildi. Astanamen baılanysyp, keńes ótkiziledi», - dedi oblystyq densaýlyq saqtaý basqarmasynyń basshysy Rústem Isaev.
Eske salsaq, Aqtóbe oblysy Jańajol ken ornynda zaýyttan shyqqan órtten 4 jumysshy kúıip qaldy. Órt 14 saǵatta sóndirildi. Oǵan Temir, Muǵaljar aýdandarymen qatar Aqtóbe qalasynan órt sóndirýshiler bardy. Sondaı-aq, qylmystyq is qozǵalyp, tergeý júrip jatyr.
Al, «SNPS-Aqtóbemunaıgaz» AQ-nyń resmı saıtynda ákimshiliktiń málimeti jarııalandy.
«Jospardan tys jóndeý jumystary júrgizilgen kezde qubyrdan gaz shyǵyp, onyń arty órtke ulasqan. Ol kezde dıametri 219 mm bolatyn gaz ótkizý qubyry jóndeldi. Qubyr rezervte turdy, ıaǵnı jumys istep turǵan negizgi qurylǵydan ajyratylǵan edi. Órt qaýipsizdigi erejesine sáıkes oqıǵa ornyna «Semser-Órt sóndirýshi» JShS-niń órt sóndirýshileri shaqyryldy. Órt 2 mamyr kúni saǵat 6:20-da tolyq sóndirildi. Ókinishtisi – daıyndaý tsehynyń jumysshylaryn kúıik shaldy. Aktsıonerlik qoǵam zardap shekken ár jumysshyǵa 1 mln teńge materıaldyq shyǵyn tóleıdi. Al, órttiń shyǵý sebebi memlekettik komıssııa tekserýinen soń anyqtalady. Jańajol munaı-gaz kesheninde magıstraldy gaz qubyryna arnalǵan taýarly gazdy jetkizý shuǵyl túrde qalpyna keltirildi. Sonymen birge, suıtylǵan gaz óndirý jáne jetkizý jumysy retteldi», - dep jazylǵan habarlamada.
