Jańajol gaz keshenindegi órtten qaıtys bolǵan jumysshylardyń otbasyna 5 mln teńgeden kómek beriledi

ASTANA. QazAqparat – Aqtóbe oblysyndaǵy gaz kesheninde órtten qaıtys bolǵan jumysshylardyń otbasyna 5 mln teńgeden kómek beriledi. Bul týraly aımaq basshysy Eraly Toǵjanov ortalyq kommýnıkatsııalar qyzmetinde ótken brıfıngide málim etti, dep habarlaıdy QazAqparat tilshisi.

«Tekserý jumystarynyń qorytyndysy áli shyqqan joq. Biraq men barǵan bette komıssııa qurǵyzdym. Ony ózderińiz jaqsy bilesizder. Tótenshe jaǵdaılar departamentiniń janynan memlekettik ınspektsııa da jumys istep jatyr. Sol jerde birden qylmystyq is qozǵaldy.

Ózderińiz bilesizder, tórt azamatty birden Aqtóbege alyp keldik. Keıin úsheýin Astanaǵa jiberdik. Óıtkeni jaǵdaılary kúrdeli boldy. Eki azamatymyz qaıtys boldy. Olar aýylǵa jetkizildi, bireýi Embiden, ekinshisi Muǵaljardan. Ekeýi de jerlendi. Ashyǵyn aıtqanda qıyn jaǵdaı. Búgin taǵy eldiń aldynda otbasylaryna qaıǵyryp kóńil aıtamyn», - dedi Eraly Toǵjanov.

Sondaı-aq, ol osy órtten qaıtys bolǵan azamattardyń otbasyna qandaı kómek kórsetilip jatqanyn aıtty.

«Bul jaıt qazir erekshe qadaǵalaýymyzda. Men barǵan bette árbir semıaǵa 1 mln teńgeden bólgizdim. Al qaıtys bolǵan azamattardyń otbasyna 5 mln teńgeden bólinedi. Sonymen qatar kámelet jasyna tolmaǵan, 18 jastaǵy balalar bolsa, joǵary oqýda bolatyn balalarǵa da memleket tarapynan arnaıy járdemaqy qarastyrylǵan. Onyń bári zań boıynsha bólinedi. Másele meniń erekshe qadaǵalaýymda», - dedi ákim.

Eske salsaq, óńirdegi Jańajol gaz kesheninde órtten tórt adam aýrýhanaǵa túsip, ekeýi qaıtys bolǵan edi. https://kaz.inform.kz/news/zhanazhol-munay-gaz-kesheninde-kuyik-shalgan-zhumysshy-auruhanada-koz-zhumdy-aktobe-oblysy_a4066915