Jańajyldyq korporatıv keshiniń baǵasy qansha
Bıyl merekelik keshterdiń baǵasy jyldaǵydaı ártúrli bolyp tur. Mázir men arnaıy baǵdarlama usynǵan meıramhanalar 10 myń teńge jáne odan joǵary baǵaǵa qurylǵan qyzmet túrin usynady. Kazinform agenttiginiń tilshisi óńirlerdegi jańajyldyq korporatıv keshiniń baǵasyn salystyrdy.
Jańajyldyq kesh jaqyndap keledi. Demek meıramhanalardaǵy shoý baǵdarlamaǵa suranys ta artady. Ujymdyq basqosý quny elimizdiń ár óńirinde ártúrli. Tek shaqyrylǵan óner juldyzdary men baǵdarlamasyna, as mázirine qaraı aldyn ala tapsyrys berip úlgerý kerek.
Baǵa bir qalanyń ózinde ártúrli bolyp tur. Kóńil kóterý oryndarynyń deńgeıi, syıymdylyǵy men shoý baǵdarlama, onyń ishinde Aıaz ata men aqshaqardyń qyzmetine qaraı quny da belgilenedi.
Biz jańajyldyq keshtiń ortasha baǵasyn bildik. Eki ystyq tamaq, úsh-tórt salat, tiskebasary men jemis-jıdek, arnaıy baǵdarlamasy bar dastarhan qunyn qarastyrdyq. Oǵan ishimdik baǵasy qosylmaıdy.
Elimiz boıynsha eń qymbaty – Almaty qalasynda. Keıbir kóńil kóterý oryndarynda baǵa kem degende 30 myń teńgeden bastalady. Baǵdarlamaǵa mol dastarhan, shoý baǵdarlama men túrli baıqaý, bı alańy kiredi. Qoljetimdi jańajyldyq keshter keıbir meıramhanada 50 myń teńge bolyp tur. Qalada 100 myń jáne odan da joǵary baǵada jańajyldyq kesh uıymdastyryp jatqan meıramhana, klýbtar da tabylady.
Almaty qalasynda adam basyna 120-150 myń teńge bolatyn jańajyldyq korporatıv uıymdastyratyn demalys oryndary óz máziri men shoý baǵdarlamasyn usynady.
Astana men Qaraǵandyda baǵa shamalas. Elordada baǵasy qoljetimdi meıramhana tabý qıynǵa tústi. Degenmen ár adamǵa 20-25 myń teńge bolatyn baǵdarlama usynatyn oryndar bar. Al kóbi 50-70 myń teńgelik jańajyldyq korporatıv keshin usynady. Qyzmet qunyna sýsyn men ishimdik kiredi. Oǵan kóp asa shekteý qoımaıdy. Astana qalasynda kompanııalar qyzmetkerleriniń shyǵynyn ishinara nemese tolyqtaı ótep beredi. Al eger ishinara ótese, adamdar 20-30 myń teńge tóleıdi. Qaraǵandydaǵy kóp meıramhana men túngi klýb jańajyldyq kesh baǵasyn 20-50 myń teńge dep bekitken. Baıqaýlar uıymdastyrylady, arnaıy shoý baǵdarlamasyn usynady. Al sýsyn men shyryndy, ishimdikti kelýshiler ózderi qosymsha alyp barady.
Shymkent pen Jezqazǵanda jańajyldyq keshtiń ortasha baǵasy shamamen 30 myń teńge. Jezqazǵanda baǵa Qaraǵandy qalasyna uqsas. Qazir jańajyldyq keshke 20-40 myń teńge tóleýge bolady. Bul qyzmet qunyna shyryn men ishimdik aqysy kirmeıdi. Shymkentte ujymdyq keshke 13-17 myń teńge tóleýge bolady. Munda kóp taraǵan mázir usynady, bı alańy da bar. Sonymen birge 100 myń teńgelik jańajyldyq keshti de keziktiremiz. Kóbine ujymdar ár adamǵa 20-45 myń teńge bolatyn demalys oryndaryn tańdaıdy. Qyzmet aqysyna mol dastarhan kiredi. Onda ystyq tamaq, tiskebasar men keı jerde baǵasy qoljetimdi ishimdikti de qosa esepteıdi. Mádenı baǵdarlamaǵa DJ, kóńildi shoý men jańajyldyq bezendirý kiredi. Elimizdiń ońtústik megapolısindegi keıbir demalys oryndary aldyn ala aqy suramaıdy, depozıt bekitpeıdi. Tek mázir boıynsha tapsyrys berý jetkilikti.
Qostanaı qalasyndaǵy ortasha baǵa – 24-30 myń teńge. Sonymen birge 70 myń teńge bolatyn jańajyldyq keshtiń birin tańdaýǵa bolady. Soǵan qaramastan baǵasy qoljetimdi demalys oryndary ystyq tamaqqa et usynady. Dastarhanǵa jeńsik as, salat pen túrli kondıterlik ónim de qoıady. Al shoý baǵdarlama kezinde anımatorlar óner kórsetedi. Taqyryptyq keshte dombyra tartyp, bıshiler ortaǵa shyǵady. Sonymen birge saksofonda oınaıtyn ónerpazdar bar. TV-show formatynda ıntellektýaldyq oıyn uıymdastyrylady.
Qyzylorda, Qonaev pen Túrkistanda korporatıv keshteriniń baǵasy orta eseppen 25 myń teńge. Qyzylordada qazir ujymmen birge Jańa jyldy ótkizý úshin ár adamǵa 20-30 myń teńge suraıdy. Al Túrkistanda baǵa 7 myń teńgeden bastalyp, 30-35 myń teńgege deıin jetti. Sonymen birge premıým banketter baǵasy – 40-70 myń teńge. Qonaev qalasyndaǵy habarlandyrýlardy qarap, baǵany salystyrǵanda demalys oryndarynyń usynysy 16-18 myń teńge aralyǵynda ekenin bildik. Sonymen birge 50 myń teńgege odan da joǵary as máziri men shoý baǵdarlama usynatyndar bar.
Óskemen qalasyndaǵy jańajyldyq korporatıv keshiniń baǵasy – 14-33 myń teńge.
Atyraý qalasynda qoljetimdi banket baǵasy 18 myń teńge bolsa, keıde 27 myń teńgege jetedi. Al baǵasy odan joǵary bolsa shyryn, sýsyn men ishimdik beriledi.
Aqtóbe, Taldyqorǵan, Taraz ben Pavlodarda baǵa orta eseppen – 20 myń teńge. Aqtóbe qalasynda keń tańdaý bar. Korporatıv keshiniń baǵasy 10-35 myń teńge aralyǵynda. Bul óńirdegi kóp demalys orny 20 myń teńge bolatyn kesh uıymdastyrady. Merekelik dastarhan jaıylyp, ártister óner kórsetedi. Olardyń arasynda jergilikti jáne shaqyrtýmen kelgen óner juldyzdary bar. Taldyqorǵanda banketti 16-18 myń teńgege jasap beredi. Keıbir demalys oryndary ústelge syılyq retinde aqqaınar qoıady. Tarazda meıramhanalardyń kóbi jańajyldyq kesh baǵasyn 15-25 myń teńge dep bekitken. Sonymen birge taqyryptyq keshter men shoý baǵdarlamasyna qaraı baǵa 40 myń teńgege deıin jetedi. Pavlodar qalasyndaǵy ortasha baǵa – 25-30 myń teńge. Oǵan úsh tiskebasar, úsh salat jáne eki ystyq tamaq kiredi. Іshimdik quny qosylmaıdy. Shaǵyn ǵana meıramhanalar mundaı keshti uıymdastyrǵanda ár adamǵa 15-20 myń teńge alady. Baǵaǵa ujymdyq kesh uıymdastyratyn kún de áser etedi. Mázir tańdaǵanda taǵam túrin azaıtyp, baǵasyn tómendetip alýǵa bolady.
Petropavl, Aqtaý, Kókshetaý men Oralda ár adamǵa ortasha baǵa – 18 myń teńge. Oralda jańajyldyq kesh 12 myń teńgeden bastalyp, keı jerde 20 myń teńgege deıin jetedi. Kókshetaý men Petropavlda merekelik dastarhan jaıyp, shoý baǵdarlama usynǵan demalys oryndary ár adamǵa kem degende 15 myń teńge alady. Aqtaý qalasynda korporatıv keshteriniń baǵasy 40 myń teńgeden bastalyp, óse beredi. Merekelik kóńil kúı syılaıtyn oryndar qyzyqty baǵdarlamasyn da usynady.
Elimiz boıynsha eń arzany jańajyldyq kesh quny 10-22 myń teńge aralyǵynda. Semeı qalasyndaǵy demalys oryndary arasynda quny qymbat meıramhana az. Sondyqtan turǵyndar kóbine ortasha baǵany tańdaıdy.
Buǵan deıin qysqy demalys oryndaryndaǵy qyzmet aqysy týraly jazyldy. Sonymen birge mandarın baǵasyn salystyrdyq.