Jańazelandııalyq fanat: Ólim aýzynda jatqanda Dımashtyń ánin estip, basymdy kóterdim
Aqtóbe qalasyna Dımash Qudaıbergenniń bir top fantop jetekshisi keldi. Olar ánshimen ońasha kezdesip, óz oılaryn aıtty, kókeıde júrgen suraǵyn qoıdy. Olardyń arasynda Anıta Raı Ýordtyń taǵdyry bólek. Jańa Zelendııadan kelgen qarııa qaterli isik aýrýyna shaldyqqan. Armany úshin dertiniń aýyrlyǵyna qaramaı, Dımash Qudaıbergenmen kezdesý úshin Aqtóbege kelgen. Fanat qazaq tilin de úırenip júr.
"Búırektiń qaterli isigine shaldyǵyp, eki ret ota jasatqan edim. Tipti ómirden baz keship, tósekke tańyldym. Sol kezde ıýtýbtan Dımash Qudaıbergenniń Opera-2 ánin estip es jıdym, basymdy kóterdim. Qaıta turyp, ómir súrýge qushtarlyǵym artty", - dedi zeınetker Anıta Raı Ýord.
Fanat Dımash Qudaıbergenniń ánin 2017 jyldyń qyrkúıeginde alǵash ret tyńdap, úsh aı boıy bar ánin áleýmettik jeliden qarap shyqqan.
"Maǵan 4 deńgeıli búırektiń qaterli isigi degen dıagnoz qoıdy. Qıyn kezde maǵan kúsh pen dem bergen jalǵyz Dımash boldy. Ótken jyly kúzde Qytaıda ótken kontsertine barǵym kelgen. Biraq turaqty em alyp, dári ishtim. Sáti osy joly túsip, Aqtóbeni kórdim. Bálkim, bul meniń sońǵy saparym shyǵar. Dımashty kórip, sheksiz qýandym", - dedi fanat.
Eske salsaq, Dımash Qudaıbergen "Baqytty bala" baıqaýynda aqyldastar alqasynda otyr. Erteń baıqaý qorytyndylanyp, Dımash Qudaıbergen gala kontsertte án aıtady.
