Janaza, as kezinde ysyrapshyldyqqa jol bermeý kerek - Janseıit Túımebaev

TÚRKІSTAN. QazAqparat - Túrkistan oblysynyń ákimi Janseıit Túımebaev óńir ımamdarymen kezdesip, birqatar ózekti máselelerdi talqylady. Kezdesý kezinde aımaqtaǵy dinı ahýal turaqty ekendigin jetkizgen din salasynyń qyzmetkerleri atqarylǵan jumystarǵa toqtalyp, alda jasalatyn dinı is-sharalar josparymen tanystyryp ótti, dep habarlaıdy QazAqparat tilshisi.

Basqosýǵa Qazaqstan musylmandary dinı basqarmasy Túrkistan oblysy boıynsha ókil ımamy Musabek Aqtamberdi men «Din máselelerin zertteý ortalyǵy» KMM dırektorynyń mindetin ýaqytsha atqarýshy Mádı Besbaev, Jetisaı aýdanynyń bas ımamy Bekzat Syzdyqov pen Tólebı aýdanynyń bas ımamy Samat Anarbaevtar qatysty. Olar oblys basshysyna dinı ahýalǵa baılanysty óz usynys-pikirlerin bildirdi. Ózge aǵymdarǵa qarsy aǵartý jáne dinı ekstremızmniń aldyn alýda júıeli ister júrgizilip jatqanyn aıtyp, birneshe baǵytqa bólingen jumystardyń jaı-kúıin baıandady. Óz kezeginde qoǵamdaǵy jastardyń tárbıesine aıryqsha kóńil bólý kerektigin basa aıtqan Janseıit Túımebaev ımamdarǵa birneshe másele boıynsha tapsyrmalar berdi. Dinı turaqtylyqty saqtaý maqsatynda aýdan qalalarda dástúrli dinı baǵyttaǵy úgit-nasıhat jumystaryn jalǵastyrýdy tapsyrdy.

«Halyqpen meıilinshe tıimdi jumys jasaý úshin Elbasy barlyq jaǵdaıdy jasap otyr. Balalar, jastar úshin kúndelikti jumys isteýimiz kerek. Janaza, as berý kezinde ysyrapshyldyqqa jol bermeýdi aıtyp kelemiz. Qazaq halqyna tán salt-dástúrler men ádet-ǵurypty nasıhattap, soǵan mán berý mańyzdy», - dedi oblys ákimi.