Jańatastaǵy órt: Sotqa deıingi tergeý bastaldy
TARAZ. QazAqparat – Jańatastaǵy kópqabatty úıde bolǵan órt oqıǵasy boıynsha sotqa deıingi tergeý amaldary bastaldy, dep habarlaıdy QazAqparat tilshisi.
Bul týraly óńirlik kommýnıkatsııalar qyzmetiniń aqparat alańynda ótken baspasóz brıfınginde Jambyl oblystyq polıtsııa departamenti bastyǵynyń birinshi orynbasary Baqyt Rataev habarlady.
«Órt faktisi boıynsha QR Qylmystyq kodeksiniń 292-babynyń 3-bóligi boıynsha sotqa deıingi tergeý bastaldy. Sot-saraptama ortalyǵy mamandarynyń aldyn ala málimetine sensek, ólim ýly gazdan ýlanýdan bolǵan. Al órt ashyq ot kózi tutanǵysh materıaldyń, ıaǵnı tósek-oryn jabynynyń betine tıgeninen shyqqan. Órttiń qorytyndy sebepteri barlyq qajetti saraptama nátıjesi boıynsha jarııalanady», - deıdi Baqyt Rataev.
Arnaıy komıssııanyń tóraǵasy, Jambyl oblysy ákiminiń orynbasary Ulan Jazylbektiń aıtýynsha, otbasy tolyqqandy.
Otaǵasy medıtsınalyq mekemede jumys isteıdi, anasy dekrettik demalysta (mektepte muǵalim).
Sondaı-aq, ol áleýmettik jelilerde taraǵan «órtten zardap shekken 60 jastaǵy áıel» týraly qaýesetti joqqa shyǵardy.
«Bul aqparat shyndyqqa janaspaıdy. Basqa zardap shekkender joq», - dep atap ótti U. Jazylbek.
Eske sala keteıik, keshe Jańatas qalasynda kópqabatty úıden órt shyǵyp, 5 bala kóz jumǵan bolatyn.
Búgin arnaıy brıfıngte Jańatastaǵy 5 bala mert bolǵan órttiń aldyn ala sebebi aıtyldy.
