Jańatasta jeti balanyń anasy úıinen tigin sheberhanasyn ashty
Jambyl oblystyq jumyspen qamtýdy úılestirý jáne áleýmettik baǵdarlamalar basqarmasynyń aqparatynsha, kópbalaly Aıda Aqylbekovaǵa aı saıyn 163 myń 826 teńge kóleminde jalpy somasy 1 mıllıon 965 myń 912 teńge ataýly áleýmettik kómek taǵaıyndalǵan. Alaıda ol tek ataýly áleýmettik kómekke qarap, qol qýsyryp otyrǵan joq. Ol áleýmettik kelisimshart boıynsha jumysqa ornalasýǵa járdemdesýdiń belsendi sharalaryna qatysyp, óz úıinde tigin sheberhanasyn ashý isin qolǵa aldy.
«Kópbalaly anaǵa memleket tarapynan qoldaý bolýy kerek, biraq únemi áleýmettik kómek alǵannan góri óz bıznesi bolǵany durys. Qolynnan is kelse, óz násibińdi mańdaı terińmen taýyp jegenge ne jetsin. Men 25 jasymnan bastap qurylysshy-montajshydan aspaz mamandyǵyna deıin túrli kýrstarda oqydym. Qolymnan barlyq nárse keledi dep batyl aıta alamyn. Úıde jóndeý jumystaryn da jasaı alamyn, shashty da ádemilep qysqartamyn, asty da dámdi etip pisiremin», -degen Aıda «beınettengenniń berekesi artady» degen támsildi ózine berik ustanym etip alǵanyn aıtady.
Kópbalaly ana AÁK alǵannan keıin qysqamerzimdi kýrstarǵa qatysyp, tiginshi mamandyǵyn meńgeripti. Memlekettik grant boıynsha qajetti qarjyǵa qol jetkizip, tigin mashınasyn, útik, útikteý taqtasy men as pisiretin kásibı pesh satyp alǵan. Qazir ol jańa týǵan nárestelerge arnalǵan kıim tigý boıynsha tapsyrystar qabyldap, násibin arttyryp otyr. Bul ǵana emes, Aıda qys mezgilinde mektep ashanalaryna arnap túrli toqash pisirýdi josparlap otyr. Keńje balasy áli kishkentaı bolǵandyqtan kópbalaly ana bul jumysty ázirge tek úıinde atqaryp otyr.
Aıta keteıik, Aıda Aqylbekova - kásibin dóńgeletip alyp ketken óńirdegi bir ǵana kópbalaly ana emes. Osyǵan uqsas jaǵdaı Qordaı aýdanynda turatyn bes balanyń anasy Merýert Choraevanyń da basynan ótken. Ol shashtaraz mamandyǵy boıynsha qysqamerzimdi kýrsta oqyp, 505 myń teńge kóleminde memlekettik grantty alǵan. Merýert ol qarjyǵa sulýlyq salonyn ashyp, jumysyn jandandyryp otyr.
