Jańatasta Orta Azııadaǵy eń iri jel elektr stansasynyń qurylysy bastaldy
TARAZ. QazAqparat – Jambyl oblysynyń Sarysý aýdanynda qýatty 100 megavatt bolatyn «Jańatas Jel elektr stansasy» JShS-nyń qurylysy saltanatty túrde bastaldy,-dep habarlaıdy QazAqparat tilshisi.
Qurylys jumystarynyń alǵashqy kezeńi bastalǵan bul jel elektr stansasy aldaǵy ýaqytta Orta Azııadaǵy jelden elektr qýatyn óndiretin eń úlken stansa bolmaq.
Bul elektr stansasyn salý týraly kelisim ınvestorlarmen 2013 jyldyń mamyr aıynda júrgizildi. Qazir baǵanalardy ornatý jumystaryna mamandardan bólek, jergilikti turǵyndardan 300-ge jýyq adam tartylǵan. Jobanyń jalpy quny – 130 mıllıon dollar. Bul nysannyń qurylysy 2020 jyly tolyq aıaqtalyp, 40 adam turaqty jumys isteıdi dep kútilýde.
«Qazirgi ýaqytta
jobany júzege asyrý úshin Sarysý aýdany ákimdiginiń Túrkistan aýyldyq okrýginen 233
gektar jer berilgen. Investıtsııalyq joba aıasynda jergilikti halyqtyń jaǵdaıyn
jasaýmen qatar áleýmettik-ekonomıkalyq damýǵa serpin berilmek. Jel elektr stansasynyń
qorshaǵan ortaǵa sanıtarlyq-epıdemıologııalyq áseri tolyq tekserilip, oblys
ákimdiginiń tabıǵı resýrstar jáne tabıǵat paıdalanýdy retteý basqarmasynyń oń qorytyndysyn
aldy. Qurylys jumystarynyń alǵashqy kezeńin bastaǵaly otyrǵan jel elektr stansasy
Orta Azııadaǵy elektr qýatyn óndiretin eń úlken stansa bolmaq», - dedi oblys
ákiminiń orynbasary Nurjan Kalenderov.
Aıta keteıik, jobanyń negizgi aktsıoneri - «Vızor Qazaqstan» kompanııasy. «Jańatas
Jel elektr stansasy» JShS birinshi jartyjyldyqta Sarysý aýdany ekonomıkasynyń
negizgi kapıtalyna 4,5 mıllıard teńge kóleminde ınvestıtsııa salyp, negizgi
kórsetkishterdiń oryndalýyna oń áserin tıgizdi.
Saltanatty sharada kelisim shartqa qol qoıylyp, ınvestorlar aýdandyq aýrýhanaǵa jedel járdem kóligin syıǵa tartty.
