Jańatasta qatty jelden keıin jylýsyz qalǵan mektepterdi generatormen jylytady

JAŃATAS. QazAqparat - Jambyl oblysynyń ákimi Nurjan Nurjigitov Sarysý aýdany Jańatas qalasyna baryp, qarly daýyldan keıingi jaǵdaımen tanysty, dep habarlaıdy QazAqparat.

Aımaq basshysy aldymen «JańatasSýJylý» MKK qalpyna keltirý jumystaryn tekserdi.

Sondaı-aq, qatty jelden qulaǵan elektr baǵanalaryn kórip, olardy jóndeý boıynsha jaýaptylarǵa tapsyrma júktedi.

D.Qonaev atyndaǵy orta mektebinde bolǵan oblys ákimi qaladaǵy eki-úsh oqý ordasyn jylytýǵa barynsha kóńil bólý kerektigin basa aıtty.

Ol úshin arnaıy generatorlar paıdalanylady. Bul mektepter jylytý pýnkti retinde daıyn turýy mańyzdy.

«Shahan» qosalqy stantsııasyna barǵan Nurjan Nurjigitov qalany eń aldymen elektr energııasyna qosý kerektigin jetkizdi.

Qazirgi kezde elektr jelilerin retteý jumysyna 10 brıgada jumyldyrylǵan.

Aımaq basshysy bul jumysty 2-3 saǵatta aıaqtaýdy tapsyrdy.

Eske sala keteıik, Jambyl oblysynyń Sarysý aýdanynda tabıǵı sıpattaǵy tótenshe jaǵdaı jarııalanǵan edi.