Jańatasta iri jel elektr stantsııasy salynýda – Jambyl oblysy
TARAZ. QazAqparat – Jambyl oblysy Jańatas qalasynyń mańynan «Jańatas» jel elektr stantsııasy salynýda, dep habarlaıdy QazAqparat tilshisi.
«Jańatas» JES qurylysyna jalpy 233 gektar jer bólingen. Investor «China Power International Holding Ltd» kompanııasy júrgizip jatqan joba quny 130 mıllıon AQSh dollaryna teń.
Jobanyń alǵashqy kezeńi boıynsha 40 jel qondyrǵysy ornatylyp, qýattylyǵy 100 MVt-ty quraıdy dep kózdelgen. Al, ekinshi kezeńde qýattylyqty 200 MVt-qa deıin ulǵaıtý josparlanýda. Jalpy stantsııa jyl saıyn jelden 340 mıllıon kVt/s elektr energııasyn óndiredi dep boljanyp otyr. Ótken jyly bastaý alǵan joba keler jyly naýryz aıynda iske qosylatyn bolady. Qazirgi tańda qurylys barysynda 200 adam ter tógýde, joba tolyǵymen iske qosylǵanda 40 adam turaqty jumyspen qamtylmaq.
Búginde nysan aýmaǵynda jel derekterin ólsheý boıynsha 6 qurylǵy ornatylǵan. Taǵy da dińgekter ornatý úshin 14 irgetas quıylyp, qazanshuńqyrlar daıyndalýda. Jalpy, eki kezeń boıynsha osyndaı barlyǵy 80 qurylǵy ornatylmaq. Qurylǵylardyń bıiktigi 100 metrdi qurasa, aınalmaly jel baǵanalarynyń dıametri 80 metr bolady.
