Jańatasta 20 myń turǵyndy jylýsyz qaldyrǵan apatqa kináliler jazasyz qalmaıdy

TARAZ. QazAqparat – Jambyl oblysy Jańatas qalasynda 20 myńnan astam adamdy jylýsyz qaldyrǵan ortalyq qazandyqtaǵy apatqa kináliler tıisti jazasyz qalmaıdy. Bul týraly arnaıy jıyn barysynda oblys ákimi Berdibek Saparbaev aıtty, dep habarlaıdy QazAqparat tilshisi.

9 aqpan kúni 20 myńnan astam adam turatyn Sarysý aýdanynyń ákimshilik ortalyǵy – Jańatas qalasynda ortalyq qazandyq isten shyqqan bolatyn.

Apat saldarynan turǵyndar jylýsyz jáne ystyq sýsyz qaldy.

Naqtyraq aıtqanda, barlyǵy 92 kópqabatty úı jáne 40-tan astam bıýdjettik mekeme jylýdan ajyraǵan.

Tek 11 aqpanda ǵana jylýmen qamtý qaıta qalpyna keltirilgen.

Jańatas qalasynyń qazandyǵyndaǵy tótenshe jaǵdaı Berdibek Saparbaevtyń tóraǵalyǵymen oblys ákimdiginde ótken keńeste jan-jaqty talqylandy.

Mamandardyń aıtýynsha, tehnıkalyq aqaý sapasyz otyndy paıdalaný saldarynan oryn alǵan, sol sebepti mazýt sharýashylyǵy júıesin tolyǵymen tazartýǵa týra keldi.

«Úsh kún boıy adamdar sýyq páterlerde jáne qyzmettik kabınetterde jumys jasaýǵa májbúr boldy. Bul, eń aldymen, aýdan basshylyǵynyń óziniń qyzmettik mindetterine jaýapsyz qaraýynan oryn aldy. Aýdan ákimi Baqytjan Jaqsylyqov qazandyqta bir jarym aıǵa jetetin qajetti otyn qory bar ekenine sendirdgen edi. Nátıjesinde otyn qory joq ekeni belgili boldy. Sonymen qatar, merdiger jetkizgen mazýt ta paıdalanýǵa jaramsyz bolyp shyqty. Bul oraıda túrli suraqtardyń týyndaýy zańdy. Nelikten ákimdik kúmándi merdigermen jetkizý shartyn jasasqan? Sapasyz otyndy jetkizýge qatysty nege der kezinde tıisti shara qolǵa alynbaǵan? Bul máseleni quzyrly organdar qaraýy kerek. Kinálilerge qatysty qatań sharalar qabyldaıtyn bolamyz», - dedi aımaq basshysy.

Berdibek Saparbaev qadaǵalaý organdary qyzmetkerleriniń qatysýymen jedel komıssııa qurýdy tapsyrdy.

Bul komıssııa naqty kinálilerdi anyqtap, olardy jazalaý boıynsha usynystar engizýi kerek.

Keńeste mazýt jabdyǵynan bas tartý jáne Jańatas qazandyǵyna gaztýrbınalyq qondyrǵy ornatý týraly usynys aıtyldy.

Osylaısha eskirgen jabdyqtan qutylý jáne otyn shyǵyndaryn azaıtý sekildi eki máseleni birden sheshý múmkindigine nazar adýaryldy.

Biraq bul úshin aldymen senimdi ınvestor tabý qajet.