Jańatas qalasyna tabıǵı gaz tartylyp jatyr
Berdibek Saparbaev aýdandaǵy jumys sapary barysynda birinshi kezekte aımaq basshysy Túrkistan oblysynyń Shaıan aýylynan «EvroHım-Tyńaıtqysh» kompanııasynyń zaýytyna deıin sozylatyn gaz qubyrynyń qurylysy barysymen tanysty. Energetıka jáne TKSh basqarmasy basshysynyń m.a. Qudaıbergen Qorǵanbaev jobanyń merdigeri «StroyGazKompany» JShS ekenin jetkizdi.
Gaz qubyrynyń uzyndyǵy - 98,3 shaqyrym. Nysan kelesi jyly paıdalanýǵa beriledi dep kútilýde. Nátıjesinde Jańatas qalasyn qosa alǵanda, 14 eldi meken tabıǵı gazben qamtamasyz etilmek. Berdibek Saparbaev jumys qarqynyn tómendetpeýdi tapsyrdy.
Budan soń ol «Jumyspen qamtýdyń jol kartasy»aıasynda qaıta jańǵyrtylyp jatqan eki kópqabatty turǵyn úıdiń qurylys alańyna bet burdy. 1977 jyly salynǵan 90 páterlik eki úıdi qaıta jańǵyrtýmen«AKM Group» JShS aınalysýda.
Qurylys jumystary aǵymdaǵy jyldyń qarasha aıynda aıaqtalady dep kózdelýde. Jańatas qalasynyń ákimi Dúısenáli Borsyqovtyń aıtýynsha, úsh turǵyn úıdi qaıta jańartý boıynsha jobalyq-smetalyq qujattama ázirlengen.
Budan soń oblys ákimi jaqynda paıdalanýǵa berilgen Jańatas qalasyndaǵy sút tsehynda boldy. Quny 65 mıllıon teńge bolatyn tsehty «Baıtur 2050» JShS salǵan. Jalpy somanyń 16 mıllıonnan astam teńgesi «Eńbek» baǵdarlamasy aıasynda bólinipti. «Bıznestiń jol kartasy-2025» baǵdarlamasynyń qoldaý sharalary arqasynda ınfraqurylymmen qamtylǵan. Munda sút ónimderiniń bes túri shyǵarylatyn bolady. Jergilikti 10 turǵyn turaqty jumyspen qamtylady. Tseh táýligine 2 tonna sút óńdeýge qaýqarly.
Kásiporyn dırektory Farhat Shaımqulov birden tolyq qýatta jumys isteýge shyǵýǵa nıetti. Qazir ol sharýa qojalyqtarymen kelissózder júrgizýde. Sút ýaqtyly jetkizilýi úshin ol qajetti tehnıkany óz qarajaty esebinen satyp alýǵa daıyn ekendigine sendirdi.
F.Shaımqulov Jańatasta sút ónimderi arzan baǵamen satatyn tórt dúńgirshek ashqysy keletinin aıtty. Olarda fermerlerge de óz ónimderin satýǵa múmkindik jasalmaq.
Aýdandaǵy jumys sapary barysynda oblys ákimi elimizdegi epıdemıologııalyq jaǵdaıdyń kúrdeliligin eskere otyryp, birqatar dárihanalar men ortalyq aýrýhanaǵa at basyn burdy.
Dárihanalardan vırýsqa qarsy preparattar tabylmady. Biraq farmatsevtter jaqyn arada jańa jetkizilimniń kútilip otyrǵandyǵyna sendirdi. Berdibek Saparbaev qandaı jaǵdaıda da baǵany kótermeý kerektigin basa aıtty.
Aýdandyq aýrýhananyń bas dárigeri Baǵıla Begmanova pnevmonııamen aýyratyn naýqastar emdeletin «qyzyl aımaqtyń» jumysy týraly baıandady. Ol Berdibek Saparbaevqa 2017 jyly satyp alynǵan rentgen apparatyn kórsetti. Oblys ákimi dári-dármektiń jetispeýine qatysty alańdaýshylyǵyn bildirdi. Bul oraıda Baǵıla Begmanova aýrýhananyń rezervi bar ekendigin jáne barlyq naýqastardy qajetti preparattarmen tıisinshe qamtamasyz ete alatyndyǵyna sendirdi.
Berdibek Saparbaev «Jumyspen qamtýdyń jol kartasy» boıynsha Jańatas qalasynyń aýlalary men kóshelerin abattandyrý men kógerishtendirý jumystarynyń barysymen tanysyp, shalǵaı aýyldarǵa bet túzep, jaı-kúıinen habardar boldy.
