Jańatas qalasyn jylýsyz qaldyrǵan qazandyq qaıta qalpyna keltirildi
TARAZ. QazAqparat – Aqpannyń 11-i saǵat 18:45-te Jańatas qalasyndaǵy «Jańatas Sý-jylý» KMM ortalyq qazandyǵy turaqty jylý bere bastady, dep habarlaıdy QazAqparat tilshisi.
Keshki saǵat 22:00-de beriletin jylý temperatýrasy +39, al qaıtarymy +26 gradýsty kórsetti.
«Apatty jaǵdaıdan soń mazýt qubyrlaryn, qoımasyn kondensattan, bý qazandyǵyn sýdan tazalaý jumystary júrgizilip, qosymsha Qarataý qalasynan mazýt jetkizildi. Qazirgi ýaqytta 720 tonna otyn qory jasaqtaldy. Aıdyń sońyna deıin 1500 tonna jetkizý kózdelip otyr. Qazirgi ýaqytta jylý berýdegi temperatýralyq rejım turaqtalyp keledi»,-delingen oblys ákiminiń baspasóz qyzmetiniń habarlamasynda.
Aldyn ala málimetter boıynsha, qazandyqtyń isten shyǵýyna sapasyz mazýt sebep bolǵan. Qazir otyn jetkizýge jaýapty merdiger mekemege shara qoldaný máselesi qarastyrylýda.
Esterińizge sala keteıik, 9 aqpanda saǵat 20:00-de Jańatas qalasyndaǵy ortalyq qazandyqta jylytý qurylǵylary isten shyqqan bolatyn. Oblys ákiminiń tapsyrmasymen oqıǵa ornyna oblys ákiminiń orynbasary Ulan Jazylbek, Sarysý aýdanynyń ákimi Baqytjan Jaqsylyqov pen kommýnaldyq mekemelerdiń basshylary attandy. Jylý jáne ystyq sýmen qamtýdy turaqtandyrý jóninde barlyq tıisti sharalar qolǵa alyndy. Medıtsınalyq nysandar ýaqytsha qosymsha elektr jylytý qurylǵylarymen qamtyldy.
Qaladaǵy ortalyq jylý qazandyǵy 92 kópqabatty turǵyn úı, 41 bıýdjettik mekeme, onyń ishinde 11 bilim berý jáne 2 densaýlyq saqtaý nysanyn jylýmen qamtıdy.
Qurylǵylardyń isten shyǵý sebepterin anyqtaý men Jańatas qalasyn jylýmen qamtýdy qalpyna keltirý boıynsha jumys toby qurylǵan bolatyn.
