Jańatas fabrıkasyndaǵy jumysshylar ólimi: Sot aıyptaý úkimin shyǵardy
«Sarysý aýdandyq soty abaısyzda eki adamnyń ólimine alyp kelgen eńbek qorǵaý erejesiniń buzylýyna oraı aıyp taǵylǵan Q., S. jáne B.-ǵa qatysty qylmystyq isti qarady. Sot 2022 jyly fabrıka óndirisi barysynda shaǵyn jóndeý júrgizý úshin RÝ-1 tartý qondyrǵysynyń toqtatylǵanyn anyqtady. Jóndeý jumystaryn júrgizý barysynda eńbek qorǵaý erejesiniń buzylýyna jol berilgen. Sonyń saldarynan kásiporynnyń eki jumysshysy qaza tapqan», - delingen aýdandyq sottyń baspasóz qyzmeti taratqan aqparatta.
Sottalýshylar Q., S. jáne B. kinálaryn moıyndaǵan joq. Biraq, iske qatysty faktilermen, zardap shegýshilerdiń, kýágerlerdiń kýálik etýimen jáne zattaı dáleldermen olardyń kináli ekendigi anyqtaldy. Osydan keıin prokýror úsh sottalýshyny da 3 jyl 6 aıǵa bas bostandyǵynan aıyrýdy surady.
Sot úkimimen azamat Q. 3 jyl 6 aıǵa bas bostandyǵynan aıyrylyp, azamat B. 3 jylǵa bas bostandyǵy shekteldi. Al azamat S.-ǵa qatysty qylmystyq belgilerdiń bolmaýyna baılanysty ol kinásiz dep tanyldy jáne aqtaldy. Sonymen qatar sottalshylardan zardap shegýshilerdiń paıdasyna 5 mln teńge moraldyq shyǵyn óteletin boldy.
Aıta keterligi, sot úkimi zańdy kúshine engen joq.
