Janat Jaqııanovtyń sporttyq kıimi 800 myń teńgege satyldy
Óńirlik kommýnıkatsııalar qyzmetiniń habarlaýynsha, úsh balanyń ómirin saqtap qalý úshin uıymdastyrylǵan sharaǵa Soltústik Qazaqstannyń 300-ge jýyq turǵyny atsalysqan. Bıylǵy kómek Vladıslava Golovyrına, Ámir Ǵabdýllın jáne Karına Baımoldınalarǵa kórsetiledi.
11 jastaǵy Vladıslava balalardyń tserebraldy sal aýrýyna, splastıkalyq dıplegııa jáne epılepsııaǵa shaldyqqan. Oǵan sińirin uzartý úshin ota jasaýǵa 7 mıllıon teńge qajet.
Ahondroplazııamen kúresip keletin Ámir Ǵabdýllınge buǵan deıin ota jasalyp, aıaǵy uzartylǵan. Balanyń jaǵdaıy kúrt nasharlaǵandyqtan, taǵy da ota jasatý úshin ony Harkovke shuǵyl túrde jetkizý qajet. Ámirdiń udaıy aýyratyn aıaǵyna aýyrsynýdy basatyn dári-dármek te kómektespeıdi. Oǵan 3,7 mıllıon teńge qajet.
Al 15 jastaǵy Karınaǵa "epılepsııa jáne mıdaǵy kıstozdy-jabysqaq ózgeris" dıagnozy qoıylǵan. Ispanııada onyń ustamasyn toqtatýǵa bolady. Oǵan qajetti aqshanyń bir bóligi jınalǵan, endi taǵy da 3 mıllıon teńge qajet.
Osyǵan oraı ótkizilgen qaıyrymdylyq aýktsıonyna lot retinde qoldan jasalǵan buıymdar, jergilikti sýretshilerdiń týyndylary, Qazaqstan komandalary men sportshylarynyń formalary qoıyldy. Keıbir qatysýshylar satyp alǵan lottaryn qaıta saýdaǵa shyǵardy.
Belgili boksshy Janat Jaqııanovtyń sport kıimin jergilikti kásipker 800 myń teńgege satyp aldy. Lottyń bastapqy baǵasy 50 myń teńge dep belgilendi. Jaqııanovtyń kıimine qosa bylǵary qolǵabyn da, taǵy bir kartınany satyp alǵan kásipker aýktsıonda jalpy 1,4 mıllıon teńge jumsady. Ol boksshynyń kıimderi men qolǵabyn boks federatsııasyna berýge ýáde etti.
Qaıyrymdylyq aktsııasynan 4,6 mıllıon teńge jınaldy.