Janat Jaqııanov sońǵy jekpe-jekte qalaı jeńiske jetkenin aıtyp berdi
ASTANA. QazAqparat - Búgin WBA Super men IBO tujyrymdary boıynsha jeńil salmaqtaǵy álem chempıony Janat Jaqııanov Astanada arnaıy baspasóz máslıxatyn ótkizip, atalǵan belbeýler úshin ótken sońǵy jekpe-jekte jeńiske qalaı jetkeni jaıynda aıtyp berdi, dep xabarlaıdy QazAqparat tilshisi.
"Sol jekpe-jekte bizdiń naqty taktıkamyz ben josparymyz boldy. Alǵashqy úsh raýndta qarsylasty zerttep alǵymyz keldi. Alaıda ol josparymyz iske aspaı qaldy. Sosyn birden shabýylǵa kóshýge sheshim qabyldadyq. Oǵan qosa, qashyqtyqty saqtap bokstasýǵa da bolmady. Sebebi maǵan qaraǵanda qarsylasym shapshań boldy. Ol meni aldap túsiretin edi. Sondyqtan men ony barynsha tyqsyryp, qysym jasaýǵa tyrystym. Basqa amaly bolmady. Osyndaı taktıkaǵa kóshtik. Sóıtip, bizdiń josparymyz óz nátıjesin berdi", - dedi Jaqııanov Ortalyq kommýnıkatsııalar qyzmetinde ótken baspasóz máslıxatynda.
Aıta keteıik, jergilikti ýaqyt boıynsha aqpannyń 11-i ótken jekpe-jekte Janat Jaqııanov WBA Super men IBO tıtýldarynyń ıegeri, álem chempıony Roshı Ýorrendi jeńip, eki birdeı belbeýdi tartyp aldy. Birinshi raýndta Janat Jaqııanov eki ret nokdaýn alsa da, tarazy basyn óz paıdasyna qaraı aýystyra bildi. Osy jekpe-jekten keıin qazaqstandyq boksshy Boxing Scene reıtıngisinde 9-orynnan birden 2-shi orynǵa kóterildi. Janattyń bapkeri Rıkkı Hatton kezinde álemdik bokstyń jarqyn juldyzy, birinshi orta salmaqtaǵy IBF, WBO men IBO boıynsha álem chempıony bolǵan.
