Janat Jaqııanov kásipqoı bokstaǵy 20-shy jekpe-jegin nıkaragýalyq Mıshel Eskobarmen ótkizedi
ALMATY. 28 maýsym. QazAqparat - Búgin Ulybrıtanııanyń Belfast qalasynda qazaqstandyq kásipqoı boksshy Janat Jaqııanov nıkaragýalyq Mıshel Eskobarmen reıtıngtik jekpe-jek ótkizedi.
Qazirgi tańda Ispanııada turatyn qarsylasy buǵan deıin 15 kezdesý ótkizip, onyń jeteýinde jeńiske jetip, segizinde jeńilis tapqan bolatyn. Kásipqoı boksta ol 2009 jyly 13-shi maýsymdaǵy tuńǵysh jekpe-jegindegi jeńilisten keıin qatarynan 7 ret basym túsip, odan keıin 7 ret jeńilistiń dámin tatqan edi. Sońǵy kezdesýin 14-shi maýsymda Frantsııada jergilikti boksshy Gýıllaýmı Frenoıspen ótkizip, taǵy da taýy shaǵyldy. Al kásipqoı boks rınginde 2007 jyldan beri baq synap kele jatqan Janat Jaqııanov bolsa osy ýaqytqa deıin 19 kezdesý ótkizip, tek 1 ret ǵana jeńilistiń aşy dámin tatty. Onda da Almaty men Shymkent qalalarynda ótken 5 jekpe-jekten keıin, qatarynan 9 kezdesýde jeńilissiz kele jatqan tájirıbeli Sahıb Ýrazovqa syrt alańda ese jiberdi. Odan keıin qatarynan 14 kezdesýde qarsylastaryn shaq keltirmegen Janat 2012 jyly 11-shi jeltoqsanda uıymdastyrylǵan jekpe-jegin Gonkongta Erıý Dıaz Sıregarmen ótkizdi. Qazaqstandyq bylǵary qolǵap sheberi 8 raýndtyq bul kezdesýde ındonezııalyq qarsylasyn 2-shi raýndta sulatyp saldy.
