Janat Jaqııanov Eurasia Pacific Boxing Council týrnırinde WBC nusqasy boıynsha chempıon atandy
PETROPAVL. QazAqparat - Qazaqstandyq boksshy Janat Jaqııanov Mınskide ótken Eurasia Pacific Boxing Council týrnırinde WBC nusqasy boıynsha jeńil salmaqta chempıon atandy. Bul týraly SQO dene tárbıesi jáne sport basqarmasynyń baspasóz qyzmetinen habarlady.
Janat Jaqııanov pen grýzııalyq Gaga Edısherashvılı jekpe-jegi birinshi raýndta-aq aıaqtaldy. 30 jastaǵy qazaqstandyq boksshy Grýzııa ókilin nokaýtqa jiberdi. Barlyǵy 10 raýnd bolýy tıis edi.
Osylaısha, Janat Jaqııanov kásibı rıngte 23-shi ret jeńiske jetti. Onyń 16-syn ýaqytynan buryn aıaqtaǵan. Jalpy, qazaqstandyq bylǵary qolǵap sheberi kásibı rıngtegi 24 jekpe-jekke qatysqan. Edısherashvılı úshin bul 8 kezdesý ishindegi alǵashqy jeńilis boldy. Eske sala keteıik, bıyl sáýir aıynda Anglııada Janat Jaqııanov European Boxing Union nusqasy boıynsha Eýropa chempıony atanǵan. Ol kezdesýde jerlesimiz sol ýaqyttaǵy Eýropa chempıony frantsýz Karım Gerfıdi nokaýtqa jibergen. «Barlyq jeńisimdi Qazaqstanǵa arnadym. Daıyndalý úshin Manchesterge qaıta oralamyn, Eýrazııa jáne Eýropa chempıony ataǵyn qorǵaıtyn kezdesý bar alda. Ol 12 qarashada Avstralııada ótedi. WBC reıtıngisinde ekinshi oryndamyn. Osy jeńisten keıingi maqsatym - álem chempıony ataǵyna úmitker bolý», - dedi jekpe-jekten keıin Janat Jaqııanov.
