«Jańarý» keshendi jospary aıasynda ShQO-da aýyldyq jerlerdegi mektep pen aýrýhanalar jóndeledi
ASTANA. QazAqparat - Jumyspen qamtý baǵdarlamasynyń «Jańarý» óńirlik keshendi josparynyń aıasynda oblystaǵy áleýmettik nysandardy jóndeýge3 mlrd teńgege jýyq qarjy bólinip otyr. Oblys ákiminiń tapsyrmasyna sáıkes buǵan 300 mln teńge jergilikti bıýdjetten qosylyp, 149 mektep pen 76 feldsherlik-akýsherlik pýnkter, dárigerlik ambýlatorııalar jóndeledi, dep habarlaıdy oblys ákimdiginiń baspasóz qyzmeti.
«Bıylǵy jyly qarjyny 7 nemese 8 baǵytqa bólmeı, áleýmettik mańyzdy nysandardy jóndeýge jumsaımyz. Jalpy, «Jańarý» jospary sheńberinde 149 bilim berý jáne 76 densaýlyq saqtaý nysanyn jóndeý josparlanýda. Atalmysh nysandardyń barlyǵy derlik aýyldyq jerlerde», - dedi oblys ákiminiń orynbasary Jaqsylyq Omar «ShQO Aqparattyq ortalyǵy» AKQ-da ótken baspasóz máslıhaty barysynda.
141 mektep, 5 kolledj, jáne basqa 3 bilim berý nysandaryn jóndeý úshin 2,2 mlrd teńge bólinedi. Birinshi kezekte shatyr jumystary, jylý berý júıeleri jáne qazandyqtar.
772 mln teńge densaýlyq saqtaý nysandarynda jóndeý jumystaryn júrgizýge bólinbek. 57 otbasy-dárigerlik ambýlatorııalar men feldsherlik-akýsherlik pýnktterdi, 15 aýrýhana, 3 emhanany jóndeý josparlanýda. Nysandardyń 80%-y aýyldyq jerlerde ornalasqan. Birinshi kezekte jylý berý júıelerin jóndeý qajettiligi bar nysandar jóndeýden ótpek. Baıqaý rásimderi sáýir aıynda ótkiziledi.
Sondaı-aq, oblys ákiminiń orynbasary oblys boıynsha medıtsına qyzmetkerleri úshin 117 páter bólinetinin jetkizdi.
