Jańartylǵan Konstıtýtsııada halyqtyń erik-qalaýy basty orynǵa qoıylǵan – Snejanna Imasheva
Bul pikirdi QR Parlamenti Májilisiniń zańnama jáne sot-quqyqtyq reforma komıtetiniń tóraǵasy Snejanna Imasheva keltirdi, dep habarlaıdy QazAqparat tilshisi.
«Sońǵy eki jylda Parlament Májilisinde elimizdiń zańnamalyq aktilerine «Halyq únine qulaq asatyn memleket» tujyrymdamasyna saı keletin kóptegen túzetý engizildi. Búginde zań shyǵarý protsesine kóptegen azamat men úkimettik emes uıymdar atsalysýda. Zańgerler men quqyqtanýshylardyń ǵana emes, qoǵam pikirine de kóp kóńil bólinýde. Konstıtýtsııaǵa sońǵy túzetýler 2022 jylǵy 5 maýsymda ótken respýblıkalyq referendým qorytyndysy boıynsha qabyldandy. Ol referendým qazaqstandyq qoǵamnyń jańartylǵan Konstıtýtsııa arqyly bastalǵan jańa reformalardy qoldaıtynyn kórsetti. Ata zańǵa ózgerister engizilýine qatysty syndar da aıtyldy. Ǵalymdar, qoǵam qaıratkerleri Ata zań jaǵdaıǵa qaraı nemese yqpaldy saıası kúshterdiń qalaýy boıynsha ózgermeýi kerek degen de pikirler aıtty. Mundaı pikirlermen kelispeýge bolmaıdy», - dedi Snejanna Imasheva elordada Konstıtýtsııa kúnine oraı ótip jatqan konferentsııada.
Sot-quqyqtyq reforma komıteti basshysynyń málimdeýinshe, Ata zań memlekettiń turaqty damýynyń myzǵymas negizi bolyp, azamattardyń suranysyna saı kelýi kerek.
«Memleket pen qoǵam arasyndaǵy ózara qurmet pen senimge negizdelgen jańa saıası mádenıet qalyptasýda. Mańyzdy sheshimder endi azamattardyń qatysýymen ashyq túrde qabyldanyp jatyr. Elimizde júrgizilgen konstıtýtsııalyq reformalardyń qoǵamdy demokratııalandyrýdy, halyq bıliginiń negizderin odan ári nyǵaıtý, Parlamenttiń rólin kúsheıtý, Úkimettiń derbestigin arttyrý jónindegi negizgi qoǵam suranystaryn eskerdi. Qazir elimiz jańartylǵan Konstıtýtsııa aıasynda, halyqtyń erik-qalaýy basty orynǵa qoıylǵan ádiletti ári jańa Qazaqstanda ómir súrip jatyr», - deıdi ol.
Aıta keteıik, búgin elordada 30 tamyz Konstıtýtsııa kúnine oraı «Qazaqstan Respýblıkasynyń Konstıtýtsııasy» - qoǵam men memleketti áleýmettik jańǵyrtýdyń negizi» atty halyqaralyq ǵylymı-praktıkalyq konferentsııa ótip jatyr.
Atalǵan sharany Parlamentarızm ınstıtýty men QR Parlamenti Májilisi birlesip uıymdastyrdy. Oǵan Májilis pen Senat depýtattary, Konstıtýtsııalyq sottyń, Joǵarǵy sottyń, Bas prokýratýranyń, memlekettik organdardyń, joǵary oqý oryndary men ǵylymı-zertteý uıymdarynyń ókilderi qatysyp jatyr.
