Jańartylatyn energııa: Munaı kompanııalary alǵashqy jobalaryn iske qosady

NUR-SULTAN. QazAqparat - Búgingi tańda Qazaqstanda jańartylatyn energetıka baǵytynda 81 nysan jumys istep tur. Olardyń tolyq qýattylyǵy – 930 megavatt. Jyl sońyna deıin jańartylatyn energııa kózderiniń taǵy 5 nysany iske qosylady. Bul týraly rrimeminister.kz-ke bergen suhbatynda QR Energetıka mınıstrligi Jańartylatyn energııa kózderi departamentiniń dırektory Aınur Sospanova aıtty, dep habarlaıdy QazAqparat.

Onyń aıtýynsha, ınvestorlar men esep-qarjy ortalyǵy arasynda jasalǵan kelisimsharttar 3 myń megavattqa jaqyndady. Qazaqstan úshin bul aıtarlyqtaı kólem. Osy 3 myń megavatt birtindep salynyp, elimizdiń energetıkalyq teńgerimine engiziletin bolady.

Buǵan qosa, A. Sospanova 2019 jyly Qazaqstanda nysandar belsendi túrde paıdalanýǵa berilip jatqanyn atap ótti. 2019 jyldyń qorytyndysy boıynsha, elimizde bekitilgen qýattylyǵy 960 megavatty quraıtyn 86 nysan bolady. Aldyn ala baǵalaýlarǵa sáıkes, bul jobalar elimizge 1 mlrd dollarǵa jýyq qarjy tartýy tıis.

«Bul ınvestıtsııalar jumys oryndaryn quryp, salyq tólep, «jasyl» energııany óndirýge múmkindik beredi. Budan ózge, árıne, bul ınvestıtsııalardyń tıimdiligi – jańa salanyń qurylýy jáne bizdiń qazaqstandyq mamandardyń oqytylýy. Munda Kegoc júıelik operatory da, jelilik uıymdar da tartylǵan», — dedi A. Sospanova.

Taıaýda ǵana Qaraǵandy oblysynda qýattylyǵy 50 megavatt bolatyn kún stantsııasy paıdalanýǵa berildi. Bul jobaǵa ınvestıtsııa salǵan nemis ınvestory Qazaqstandaǵy jańartylatyn energetıka jobalaryn burynnan damytyp keledi.

Sondaı-aq A. Sospanovanyń sózinshe, respýblıkada basqa elderdiń ınvestorlary belsendi jumys isteıdi. Budan ózge, ol qazirgi zamanǵa saı este qalarlyq úrdisti atap ótti. Munaı alyptary jańartylatyn energetıka jobalaryn damyta bastady.

«Shell, Eni, Total, Iren sııaqty munaı kompanııalary jańartylatyn energııa kózderi boıynsha jobalardy damytýda jáne kelesi jyly Qazaqstanda munaı kompanııalarynyń alǵashqy jobalary jumys isteıtin bolady. Biz úshin bul Qazaqstanda munaı-gaz salasynda 20 jyldyq tájirıbesi bar turaqty ınvestorlardyń jańartylatyn energııa kózderine kelýiniń jaqsy belgisi. Bul óte jaqsy. Biz Qazaqstandy, bizdiń zańnamamyzdy jaqsy biletin osyndaı ınvestorlardyń tizimi Qazaqstan týraly jaqsy bilip keledi jáne jańaratyn energııa kózderine úlesterin qosatyn bolady dep úmittenemiz», — dedi QR Energetıka mınıstrligi Jańartylatyn energııa kózderi departamentiniń dırektory Aınur Sospanova.