Jańartylatyn energııa kózderiniń nysanyn salýǵa jer telimi erekshe jaǵdaıda bólinedi - N. Qapparov

Búgin Parlament Senatynyń jalpy otyrysynda Qorshaǵan ortany qorǵaý mınıstri Nurlan Qapparov osylaı málim etti. Eske sala keteıik, Senat otyrysynda «Qazaqstan Respýblıkasynyń keıbir zańnamalyq aktilerine jańartylatyn energııa kózderin paıdalanýdy qoldaý máseleleri boıynsha ózgerister men tolyqtyrýlar engizý týraly» zań jobasy talqylanǵan bolatyn.

Mınıstr baıandama barysynda elimizde jańartylatyn energııa kózderiniń birqatar jobalary negizinen jer ýchaskelerin osy maqsatta paıdalanýǵa ruqsat alýdyń qıyndyǵyna baılanysty júzege aspaı otyrǵanyn málimdedi. Mysaly, N. Qapparovtyń aıtýynsha, ózen alqaptary men olarmen irgeles jatqan orman qoryna kiretin ýchaskelerde shaǵyn sý elektr stansalarynyń qurylystary qıyndyqtarǵa urynyp otyr. Bul úshin shaǵyn SES salý úshin ondaı aýmaqta ornalasqan jer telimderin orman qorynan shyǵaryp, basqa sanattarǵa aýystyrý qajet. Dál osyndaı qıyndyqtar jel elektr stansalaryn salýǵa baılanysty da oryn alýda.

«Jer kodeksine sáıkes, jerdiń nysanaly maqsatyn ózgertýge baılanysty ony bir sanattan ekinshi sanatqa aýystyrý Úkimet pen jergilikti atqarýshy organdarǵa berilgen. Alaıda, kodekste jańartylatyn energııa kózderi nysandarynyń qurylysyna belgili sanattaǵy jerlerdi bólý kózdelmegen. Sol úshin jańartylatyn energııa kózderiniń túrli nysandaryn salý maqsatynda erekshe jaǵdaılarda jer bólý boıynsha tolyqtyrý engiziledi», - dedi N. Qapparov.